सुबास हुमागाईं, दुबई

मध्यक्रमका शाइमान अनवरले उत्कृष्ट अर्धशतक प्रहार गर्दै ८७ रन तथा मोहमद बुटाले
आक्रामक अर्धशतक जोडेपछि तेस्रो तथा निर्णायक ओडीआई खेलमा यूएईले नेपाललाई २ सय ५५ रनको लक्ष्य दिएको छ । आईसीसी एकेडेमी मैदानमा ओभलमा टस हारेर पहिला ब्याटिङ थालेको यूएईले निर्धारित ५० ओभरमा ६ विकेट गुमाउँदै २ सय ५४ रन बनायो ।

खराब सुरुवात गरेको यूएई कुनै समय ५० ओभर पुरै टिक्न नसक्ने अवस्थामा पुगेको थियो । तर पाँचौ विकेटका लागि अनवार र सि.पि रिजवानले २०.२ ओभरमा ४७–४ को अवस्थामा रहेको यूएईलाई १ सय रनको शतकीय साझेदारी गर्दै ४२ ओभरमा १४७-५ को बलियो अवस्थामा पुर्याएपछि यूएईले नेपाललाई गतिलो चुनौती पेश गरेको हो । अन्तिम १६ ओभरमा नेपालका बलरले १ सय ५४ रन खर्चेका थिए ।

यूएईलाई विशाल योगफल तयार पार्न उत्कृष्ट ब्याटिङ गरेको अनवरले ७० बलमा ९ चौका र २ छक्का प्रहार गर्दै ८७ रन बनाए । शतकीय साझेदारी करण केसीले ४२ ओभरको दोस्रो बलमा रिजवानलाई ४५ रनमा विकेटकीपर विनोदबाट क्याच गराउदै तोडेका थिए । रिजवानले ७६ बलमा ५ चौका प्रहार गरे । त्यस्तै आक्रममक ब्याटिङ गर्दै मोहम्मद बुटाले पनि अर्धशतक बनाए । उनले ३१ बलमा नटआउट ५९ रन जोडे । उनले ५ चौका र ४ छक्का प्रहार गरे । मोहमद नवीदले  ३ बलमा ११ रन जोडे ।

सुरुवाती १० ओभरमा १४ रन जोड्न २ विकेट गुमाएको थियो । तेस्रो अ‍ोभरको पाँचौ बलमा सोमपालले ओपनर अस्फाक अहमदलाई विकेट किपर विनोद भण्डारीबाट क्याच गराउँदै शून्यमा पेभिलिएन फर्काए । करणले चिराग सुरीलाई छैटौं ओभरको अन्तिम बलमा डक आउट पेभिलिएन फर्कापछि यूएई २–२ को कमजोर अवस्थामा पुर्याएका थिए ।

तेस्रो विकेटका लागि मोहम्द उस्मान र गुलाम शब्बेरले ४५ रनको साझेदारी गर्दै यूएईको संकट टारेका थिए । सन्दीपले २० औं ओभरको चौथो बलमा शब्बेरलाई १८ रनमा एलवी डब्लू आउट पाट्नरशिप तोडे । लगत्तै पारस खड्काले २१ ओभरको दोस्रो बलमा उस्मानलाई ललित राजवंशीको हातबाट क्याच गराउँदै २६ रनमा आउट गरे । उस्मानले ४२ बलमा ४ चौका प्रहार गरे ।

नेपालका लागि करण केसी र पारस खड्काले २-२ विकेट लिए । सोमपाल कामी र सन्दीप लामिछानेको नाममा १-१ विकेट रहयो ।

पहिलो खेलमा ३ विकेटले पराजित भएको नेपाल दोस्रो खेलमा १ सय ४५ रनले विजयी भएको थियो । आजको विजेताले तीन ओडीआई श्रृंखला २–१ ले जित्ने छ । नेपालले यूएईले प्रस्तुत गरेको लक्ष्य पष्याउन सके पहिलो ओडीआई सिरीज जित्दै इतिहास रच्ने छ ।