एजेन्सी- स्पिनर राशिद खानले उत्कृष्ट अलराउन्ड प्रर्दशन गरेपछि आयरल्यान्डसँगको चौथो वान डे खेलमा अफगानिस्तान १ सय ९ रनले विजयी भएको छ ।
२ सय २४ रनको मध्यम लक्ष्य पछ्याएको आयरल्यान्ड ३५.३ ओभरमा अल आउट हुँदै १ सय १४ रनमा समेटियो । उसका लागि केभिन ओ ब्रायनले २६, सिमी सिंह २०, कप्तान विलियम पोर्टरफील्ड २१ र पल स्टिरलिंगले ११ रन बनाउन बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । आयरल्यान्डलाई सस्तैमा रोक्न अफगानिस्तानका आफ्तब आलमले घातक बलिङ गर्दै ८ ओभरमा २ मेडन सहित २५ रन खर्चेर ४ विकेट लिए । राशिद खान र मुजिव उर रहमानले समान दुई विकेट लिदा मोहम्मद नाविद र गुलवदिन नाबीको नाममा एक-एक विकेट रह्यो ।
त्यसअघि टस हारेर पहिला ब्याटिङ थालेको अफगानिस्तानले ४९.१ ओभरमा सबै विकेट गुमाएर २ सय २३ रन बनाएको थियो । अफगानिस्तानको लागि मोहम्मद नाविदले ८५ बलमा ६ चौका प्रहार गर्दै ६४, कप्तान अस्गर अफ्घानले ५४ र राशिद खानले ५२ रन जोडे । राशिदले ५८ बलमा ६ चौका र १ छक्का प्रहार गरे ।
उत्कृष्ट अलराउण्डर प्रर्दशन गरेका राशिद “म्यान अफ द म्याच” समेत चुनिए । अन्य ब्याट्सम्यानले खासैराम्रो प्रर्दशन गर्न सकेनन् । आयरल्यान्डका लागि जेम्स क्यामरन डोवले ३,बोयर रनकिन र एन्डी म्याकब्रिनले समान दुई विकेट लिदा टिम मुर्तगले र जर्ज डोकरेलको नाममा एक-एक विकेट रह्यो ।
जितसँगै पाँच खेलमा ओडीआई श्रृंखलामा अफगानिस्तानले २-१ को अग्रता लिएको । पहिलो खेलमा अफगानिस्तान ५ विकेटले विजयी हुँदा दोस्रो खेल वर्षाको कारण रद्ध भएको थियो । तेस्रो खेलमा आयरल्यान्ड ४ विकेटले विजयी भएको थियो । पाँचौ तथा अन्तिम खेल आगमी आइतबार हुनेछ ।
