हेटौंडा (हाम्रो खेलकुद) – मकवानपुरका पूर्व क्रिकेट खेलाडी तथा प्रशिक्षक निरज श्रेष्ठको सहयोगार्थ भएको च्यारिटी खेलमा नेपाली राष्ट्रिय पुरुष क्रिकेट टोलीका कप्तान पारस खड्काको कप्तानीमा रहेको पारस-११ ले निरज-११ लाई २ विकेटले पराजित गरेको छ ।
शनिबार हुप्राचौर मैदानमा टस जितेर पहिलो ब्याटिङ रोजेको निरज-११ ले निर्धारित २० ओभरमा १ सय ७१ रन जोडेको थियो । जवाफमा पारस-११ का लागि दिपेन्द्रसिंह ऐरीले अर्धशतक प्रहार गर्दै २ बल बाँकी रहँदा २ विकेटको जित दिलाए । एक समय ५६-५ को निकै कमजोर स्थितिमा रहेको पारस-११ का लागि सोमपाल कामी र दीपेन्द्रले उत्कृष्ट साझेदारी गरे । नवौं विकेटका लागि ७८ रनको साझेदारी गर्ने क्रममा सोमपालले २९ रन जोडे । दिपेन्द्रले नटआउट ६२ रनको योगदान दिए ।
मकवानपुरका पूर्व खेलाडी निरज श्रेष्ठ रक्त क्यान्सरले ग्रसित रहेको अवस्थामा उनको उपचारार्थ च्यारिटी खेलको आयोजना गरिएको थियो । खेल दौरान विभिन्न संघ संस्था तथा व्यक्तित्व हरुले नगद सहयोग गरेका थिए । यसक्रममा कप्तान पारस खड्काले व्यक्तिगत २५ हजार रुपैयाँ सहयोग गरेका थिए । फुटबल खेलाडीद्वय रन्जन र अन्जन विष्टले पनि १० हजार रुपैयाँ सहयोग गरे । अन्य खेलाडीहरुले पनि व्यक्तिगत सहयोग गरेका छन् ।
निरज-११ टोलीमा मकवानपुरको स्थानीय खेलाडीहरुको उपस्थिति रहेको थियो । टोलीको कप्तानी रामनरेश गिरीले गरेका थिए । यता पारस-११ टोलीमा भने राष्ट्रिय टोलीका खेलाडीका साथै फुटबल खेलाडीद्वय रन्जन र अन्जन विष्ट रहेका थिए । पारस-११ बाट सोमपाल कामी, दिपेन्द्रसिंह ऐरी, ललित नारायण राजवंशी, अनिलकुमार शाह, अमित श्रेष्ठ, महबुब आलम, आरिफ शेख, सन्दीप जोरा, अमित श्रेष्ठ, अनिल मण्डल लगायतले खेलेका थिए ।
मकवानपुर क्रिकेट एकेडमी, मकवानपुर जिल्ला क्रिकेट संघ र मदन भण्डारी स्पोर्ट्स एकेडेमीको संयुक्त आयोजनामा भएको च्यारिटी खेलमा अन्य कला क्षेत्रका व्यक्तित्वहरुले पनि आफ्नो प्रस्तुति दिएका थिए ।
