एजेन्सी – ओपनर डेविड वार्नरनले सानदार अर्धशतक प्रहार गरेपछि इन्डियन प्रिमियर लिग (आईपीएल) को १२ औं संस्करणको दोस्रो खेलमा सनराइजर्स हैदराबादले कोलकता नाईट राइडर्सलाई १ सय ८२ रनको लक्ष्य दिएको छ ।

इडेन गार्डेन क्रिकेट मैदानमा टस हारेर पहिला ब्याटिङको निम्तो पाएको हैदराबादले निर्धारित २० ओभरमा ३ विकेटको क्षतिमा १ सय ८१ रन बनायो । हैदरावादलाई विशाल योगफल तयार पार्न ओपनर डेविड वार्नरले सानदार ब्याटिङ गरे । वार्नरले ५३ बलमा ९ चौका र ३ छक्का प्रहार गर्दै ८५ रनमा क्याच आउट भए ।

वार्नरको यो आईपीएलमा पुनरागम खेल समेत हो । बल टेम्परिङ काण्डका कारण वार्नरले गत संस्करणको आईपीएल गुमाएका थिए । वार्नरलाई १६ ओभरको अन्तिम बलमा आन्द्र रसेलले रोविन उथप्पाबाट उत्कृष्ट क्याच आउट गराए । वार्नरले जोनी बेयरस्टोसँग पहिलो विकेटका लागि १२.५ ओभरमा १ सय १८ रनको साझेदारी गर्दै सानदार सुरुवात दिलाएका थिए । १३ ओभरको पाँचौ बलमा पियुष चाहलले बोल्ड आउट गर्नु अघि बेयरस्टोले ३५ बलमा ३ चौका र १ छक्का प्रहार गर्दै ३९ रन बनाए ।

हैदरावादका विजय शंकरले २४ बलमा समान २ चौका र छक्का प्रहार गर्दै ४० रनमा अविजित रहे । युसुफ पठान १ र मनिष पान्डेले ८ बटुले । कोलकताका लागि आन्द्रे रसेलले २ र पियुष चाहलले समान एक विकेट लिए । अन्य कुनै पनि बलरले विकेट लिन सकेनन् ।