काठमाडौं (हाम्रो खेलकुद) – स्टार खेलाडीले भरिपूर्ण गोल्डेन गेट इन्टरनेशनल कलेजले ओमेगा कलेजलाई ६३ रनले हराउँदै गोल्डेन गेट कलेज प्रिमियर लिगमा सुखद सुरुवात गरेको छ ।

टस हारेर ब्याटिङको निम्तो पाएको गोल्डेन गेटले सुमित महर्जनको आक्रामक अर्धशतकसँगै २० ओभरमा ९ विकेट गुमाउँदै १ सय ७१ रन जोड्यो । शरद भेषावकर र दिपेन्द्रसिंह ऐरीले पहिलो विकेटका लागि ४.३ ओभरमा ५७ रनको आक्रामक सुरुवात दिलाए । दिपेन्द्र १२ बलमा ५ चौका र १ छक्कासहित ३३ रन जोड्दै बोल्ड भएपछि गोल्डेन गेटको विकेट पतन सुरु भएको थियो । त्यसपछि शरद २२, पृथु बाँस्कोटा १ तथा जितेन्द्र सिंह ठकुरी र सोनु तामाङ २-२ रनमा आउट भएपछि गोल्डेन गेट ६८-५ को स्थितिमा पुगेको थियो ।

छैटौं विकेटका लागि सुमित महर्जन र सुशान्त सिंह थापाले ८९ रनको साझेदारी गर्दै गोल्डेन गेटलाई उकासे । सुमितले ३५ बलमा ४ चौका र ४ छक्कासहित ६५ रन जोडे । सुशान्तले २५ बलमा २४ रन जोडे । ओमेगाका मन्जरत्न कुमार शाहले ३, अफजल अली र अभियान बस्नेतले २-२ तथा रवी सिंहले १ विकेट लिए ।

जवाफी ब्याटिङमा उत्रिएको ओमेगाले २० ओभरमा ६ विकेट गुमाउँदै मात्र १ सय ६ रन जोड्यो । मध्यक्रममा रवी सिंहले ३९ र अमृत थापाले २८ रन जोडेपनि अन्य ब्याट्सम्यानले साथ दिन सकेनन् । रवीले २८ बलमा ६ चौका र १ छक्का तथा अमृतले ३७ बलको सामना गर्दै ४ चौका प्रहार गरे । ओपनर विपिन शाही २, विवेक बुढाथोकी ७, अभियान बस्नेत १८ र अमन जैन १ रनमा आउट भए । अंकितप्रताप सिंह ७ रनमा नटआउट रहे । गोल्डेन गेटका नन्दन यादवले २ तथा अमरसिंह राउटेला, अभिनाश बोहोरा, दिपेन्द्र राउत र दिपेन्द्रसिंह ऐरीले १-१ विकेट हात पारे ।

त्यसअघि पहिलो खेलमा शंकर देव क्याम्पसलाई ४७ रनले पराजित गर्दै नेपाल कमर्स क्याम्पस (एनसिसि) ले गोल्डेन गेटले प्रतियोगिताको सेमिफाइनलमा पुग्ने सम्भावनालाई कायमै राखेको छ ।
त्रिवि खेल मैदानमा बुधबार भएको पहिलो खेलमा टस हारि पहिलो ब्याटिङ्ग गरेको एनसिसिका लागि ब्याट्स्म्यानहरुले संयुक्त योगदान दिएपछि २० ओभरमा ७ विकेट गुमाउदै १ सय ५४ रन बनायो ।

एनसिसिलाई एक पटक फेरि अमित श्रेष्ठले राम्रो शुरुवात दिलाएका थिए । हिमालयनसँग १२ अन्तरले पराजय बेहोरेको एनसिसिका लागि पहिलो खेलमा अमितले पहिलो विकेटका लागि शुशान्त तिमल्सिनासँग ७१ रनको साझेदारी गरेका थिए । शंकरदेवविरुद्ध उनले प्रकाश बिष्टसँग पहिलो विकेटका लागि ५२ रनमो साझेदारी गरे ।

अमितले २४ बलमा पाँच चौका प्रहार गर्दै २८ रन बनाए भने प्रकासले १६ बलमा चार चौकाको मद्दतमा २४ रन जोडे । यस्तै शुशान्तले १६ बलमा एक छक्का र एक चौका प्रहार गर्दै २२ रन बनाए । योगश भट्ट (२१) र हरिकृष्ण झा (१७ नटआउट) ले पनि महत्वपूर्ण योगदान दिएका थिए । शंकरदेवका ललित प्याकुरेलले २ तथा सन्दीप खड्का, कमल ओली, गगेंद्र बोहोरा र विनोद भट्टराईले १-१ विकेट लिए ।

जवाफमा दिपेन थापाले तीन र भुवन कार्कीले दुई विकेट लिएपछि शंकर देवले २० ओभरमा ८ विकेटको क्षतिमा १ सय ७ रन मात्र बनाउन सक्यो । शंकरदेवका रविन्द्र चन्दले ४२ रन बनाउन बाहेक अन्य ब्याट्स्म्यानहरुले उल्लेख्य योगदान दिन सकेनन् । दोहोरो अंकमा रन बटुल्ने अन्य ब्याट्स्म्यानमा दिपक बोहरा (१४) र अमित ऐर (१५) मात्र रहेका थिए । रविन्द्रले ३६ बलमा दुई छक्का र एक चौका प्रहार गर्दै ४२ रन बनाए । एनसीसीका लागि निकै कसिलो बलिङ्ग गरेका अनुभवि स्पिनर भुवनले चार ओभरमा मात्र ७ रन खर्चे । ब्याटिङ्गमा पनि नटआउट १० रन बनाएका दिपेनले तीन ओभरमा १२ रन दिए ।

समुह बी मा एनसिसि र हिमालयन कलेजको समान दुई–दुई अंक भएको छ । एक खेलमात्र खेलको हिमालयनले यसअघि एनसिसिलाई पराजित गरेको थियो । शुक्रबार शंकर देव र हिमालयनबीच हुने अन्तिम लिग खेलले समुहबाट सेमिफाइनलमा पुग्ने अन्तिम टोलीको टुँगो लाग्नेछ ।

युनिभर्सिटी क्रिकेट क्लबको योजनामा जारि प्रतियोगितामा १२ कलेज सहभागी छन् । विजेताले २ लाख २२ हजार २ सय २२ तथा उपविजेताले १ लाख ११ हजार १ सय ११ रुपैयाँ प्राप्त गर्नेछन् । यस्तै म्यान अफ द सिसिजले रु २५ हजार र प्रतियोगिताको उत्कृष्ट ब्याट्स्म्यान र बलरले जनही रु १० हजार पुरस्कार प्राप्त गर्नेछन् । प्रत्येक खेलको म्यान अफ द म्याचले एक्सटेपको प्रोयाजनमा रु ५ हजार बराबरको जुत्ता प्राप्त गर्नेछन् । ८ दिने प्रतियोगिताका सबै खेलहरु किर्तिपुरस्थित त्रिभुवन विश्वविद्यालय क्रिकेट मैदानमा हुनेछ । प्रतियोगिताको अनुमानित बजेट ३० लाख रुपैयाँ रहेको छ ।
सहभागि कलेजहरुलाई चार समुहमा विभाजन गरिएको छ र राउण्ड रोबिन लिगपछि प्रत्येक समुहको प्रथम स्थान ओगट्ने टोली सेमिफाइनल प्रवेश गर्नेछन् । दुवै सेमिफाइनल चैत्र १६ गते हुनेछ भने फाइनल चैत्र १७ गतेका लागि तय गरिएको छ ।

समुह क मा अर्किड इन्टरनेशनल कलेज, एडिया कान्तिपुर सिटि कलेज (केसीसी) र ट्रिटन इन्टरनेशनल कलेज रहेका छन् भने समुह बी मा काठमाडौं युनिभर्सिटी, नेपाल बन कलेज र त्रि चन्द्र क्याम्पस रहेका छन् । यस्तै समुह सी मा नेपाल कमर्स क्याम्पस, हिमालय कलेज र शंकर देव क्याम्पस रहेका छन् । समुह डी मा गोल्डेन गेट इन्टरनेशनल कलेज, त्रिभुव बिश्वबिद्यालय र ओमेगा इन्टरनेशनल कलेज रहेका छन् ।

बिहीबारको खेल :
अर्किड विरुद्ध ट्रीटन – ९ बजे
काठमाडौं विश्वविद्यालय विरुद्ध त्रिचन्द्र – १ बजे