काठमाडौं (हाम्रो खेलकुद) – ओपनर सुनिल धमलाले आक्रमक अर्धशतक प्रहार गरेपछि दोस्रो संस्करणको विरगन्ज च्याम्पियन टी २० क्रिकेट लिगमा नेपाल पुलिस क्लवले भारतीय क्लव बेटियालाई २० रनले हराउँदै विजयी सुरुवात गरेको छ ।

पहिला ब्याटिङ गरेका नेपाल पुलिसले निर्धारित २० ओभरमा ७ विकेटको क्षतिमा १ सय ६ रन बनाएको थियो । पुलिसका लागि सुनिल धमलाले ३६ बलमा ४ छक्का प्रहार गर्दै ५० रनमा आउट भए । कुशल भुर्तेल ११ र अमित श्रेष्ठले १२ रन जोड्न बाहेक अन्य कुनै पनि ब्याट्सम्यानले सम्झन योग्य प्रर्दशन गर्न सकेनन् । वेटियाका लागि राकेश पटेलले ३ विकेट लिएका थिए ।

१ सय ७ रनको लक्ष्य पक्ष्याएको बेटिया रामनरेश गिरी र ललितनारायण राजवंशीले समान ३ विकेट लिएपछि १५ ओभरमै ८६ रनमा अल आउट भएको थियो ।

त्यस्तै आजको अर्को खेलमा जनकपुरले भारतीय पटनालाई ५ रनले हराउँदै हराएको छ । आजदेखि सुरु भएको प्रतियोगितामा नेपाल पुलिस, जनकपुर, युनाइटेड क्रिकेट क्लव विरगन्ज, भारतीय दुई क्लव बेटिया र पटना साथै मकवानपुर गरि ६ टोलीको सहभागिता छ ।

अर्को शनिबारसम्म चल्ने प्रतियोगिताको विजेताले ७५ हजार र उप विजेताले ४० हजार प्राप्त गर्ने छन् । म्यान अफ द सिरिज हुने खेलाडीले १५ हजार र उत्कृष्ट ब्याट्सम्यान र बलरले समान ५ हजार पाउने छन् ।