काठमाडौं (हाम्रो खेलकुद) – धुर्मुस- सुन्तली फाउन्डेसनद्धारा निमार्णधीन गौतम बुद्ध अन्तराष्ट्रिय क्रिकेट रंगशाला निमार्ण सहयोगार्थ आयोजना गर्न लागेको मैत्रीपूर्ण क्रिकेट ‘मातृभूमि कप’ को तयारी अन्तिम चरणमा पुगेको छ । चैत ३० गते शनिबार कीर्तिपुरस्थित टीयू क्रिकेट मैदानमा हुने खेलका लागि कलाकारको टोली पनि बिहीबार मैदान परिसरमा तयारीमा देखियो ।
शनिबार दुई खेल हुनेछन् । नेपाली राष्ट्रिय टिमका कप्तान पारस खड्का र उप कप्तान ज्ञानेन्द्र मल्लको टिमबीच आज मातृभूमि कप मैत्रीपूर्ण क्रिकेट हुनेछ । पारस खड्काले राष्ट्रिय टिम ‘ए’ र ज्ञानेन्द्र मल्लले राष्ट्रिय टिम ‘बी’ को कप्तानी गर्नेछन् । खेल अघिल्लो शनिबार हुने भनिएपनि वर्षाका कारण खेल स्थगित गरिएको थियो ।
मातृभूमि कप मैत्रीपूर्ण क्रिकेट अझ रोचक बनाउन दर्शकहरुको लागि कलाकार ‘ए’ र कलाकार ‘बी’ बीच पनि प्रतिस्पर्धा हुने कार्यक्रम रहेको छ । टोली ‘ए’ को कप्तानी मदनकृष्ण श्रेष्ठ र टोली ‘बी’ को हरिवंश आचार्यले कप्तानी गर्नेछन् । सहयोग रकम पनि संकलन होस् र दर्शकलाई पनि भार नपरोस् भन्ने उद्देश्यले टिकट मुल्य रु ३ सय र १ हजार राखिएको छ ।
कलाकारको तयारीमा नाम चलेका हस्तीहरुको उपस्थिति रहेको थियो । विशेषत: सिताराम कट्टेल ‘धुर्मुस’, दयाहाङ राई, निश्चल बस्नेत, कमलकान्त मैनाली, सत्यराज आचार्य, लगायत कलाकार खेलका लागि व्यग्र प्रतिक्षामा रहेको देखिन्थे ।
प्रशिक्षणका तस्विरहरु:
