काठमाडौं(हाम्रो खेलकुद) – वुमन्स च्याम्पियन्स टि ट्वान्टी लिगका लागि सहभागी टोलीका मालिक र मार्की खेलाडी घोषणा गरिएको छ । क्विन्स इभेन्ट्स म्यानजमेन्ट प्रा. लि.ले आयोजना गर्ने लिगका लागि शुक्रबार पत्रकार सम्मेलनमार्फत मार्की खेलाडी र मालिकको जानकारी दिइएको हो ।
जेठ ३ देखि ११ गते सम्म कीर्तिपुरस्थित त्रिभुवन विश्वविद्यालय (त्रिवि) मैदानमा हुने लिगमा ललितपुर फाल्कोन्स,पोखरा पल्टन,क्यापिटल्स रोयल्स काठमाडौं,चितवन राइनोज र विराटनगर टाइन्टस गरि ५ ले प्रतिस्पर्धा गर्नेछन् ।
ललितपुरको मालिकमा श्रीजना जोशी रहेकी छन् । जुन ललितपुर फाल्कोन्सको स्वामित्वमा रहनेछ । त्यस्तै पोखरा पल्टन प्रा. लि. को स्वामितवमा रहेको पोखराको टोलीमा विनायक पोखरेल (अध्यक्ष), काठमाडौंको दिपा अग्रावाल ( प्रबन्ध निर्देशक) जेफोर स्पार्टस,चितवन मिङमा डण्डु शेर्पा ( प्रबन्ध निर्देशक) चितवन राइनोज प्रा. लि. र विराटनगरको पारस लुनिया(अध्यक्ष) रहेका छन् ।
राष्ट्रिय महिला टोलीकी सदस्य एवंम् पूर्व कप्तान नेरी थापा ललितपुरकी मार्की खेलाडी तोकिएकी छिन् । त्यस्तै पोखरामा सिता रानामगर,काठमाडौंमा राष्ट्रिय टोलीकी कप्तान रुविना क्षेत्री,चितवनमा इन्दु बर्मा र विराटनगरमा सरिता मगर मार्की खेलाडी चुनिएका छन् ।
यसअघि लिग चैत २२ गतेबाट ३० गतेसम्म हुने घोषणा गरेपनि प्राविधिक कारणले सानुर्नपरेको क्विन्स इभेन्ट्सका प्रबन्ध निर्देशक छुम्मी लामाले जानकारी दिए । क्विन्सले गत असोजमा पोखरा प्रिमियर लिग (पिपिएल) टि ट्वान्टी आयोजना गरेको थियो ।
