काठमाडौं (हाम्रो खेलकुद) – धुर्मुस-सुन्तली फाउन्डेसनद्धारा निमार्णधीन गौतम बुद्ध अन्तराष्ट्रिय क्रिकेट रंगशाला निमार्ण सहयोगार्थ आयोजना गरिएको मैत्रीपूर्ण क्रिकेट मातृभूमि कप आज काठमाडौंमा सम्पन्न भएको छ । मैत्रीपूर्ण क्रिकेटमा राष्ट्रिय टिमका कप्तान पारस खड्का रहेको टिम ‘ए’ लाई ज्ञानेन्द्र मल्ल कप्तान रहेको टिम ‘बी’ ले २४ रनले पराजित गरेको छ ।

टियू क्रिकेट मैदानमा पहिला ब्याटिङ गरेको मल्लको टिम बी ले निर्धारित २० ओभरमा ५ विकेटको क्षतिमा १ सय ४४ रन बनाएको थियो । ओपनर प्रदीप ऐरीले ५७ बलमा ३ चौका प्रहार गर्दै ४६ रनमा क्याच आउट भए । ऐरी दिलस्कुप शट प्रहार गर्न खोज्दा भुवन कार्कीले उत्कृष्ट क्याच लिदै पभिलिएन फर्काए ।

त्यस्तै विनोद भण्डारीले २५ बलमा ४ चौका प्रहार गर्दै ३० रनमा आउट भए । दिपेन्द्र सिंह ऐरी १८ र राजु रिजाल २० रनमा आउट भए । राजु रिजालले ठूलो शट प्रहार गर्ने क्रममा बाउन्ड्री लाईन नजिकै पारसले जादुमय क्याच गर्दै पेभिलिएन फर्काएका थिए ।टिम बी लाई सस्तैमा समेट्न भुवन कार्कीले २,सोमपाल कामी,शरद भेषवाकर र अभिनाष बोहोराले समान १ विकेट लिए ।

१ सय ४५ रनको विजयी लक्ष्य पछ्याएको पारसको ए टोली निर्धारित २० ओभरमा ७ विकेट गुमाउँदै १ सय २० रन मात्र बनाउन सक्यो । उसका लागि ओपनर अलिन कुमार शाहले २५ बलमा ७ चौका र १ छक्का प्रहार गर्दै ४१ रनको आक्रमक पाली खेलेपनि टोलीका अन्य ब्याट्सम्यान चल्न नसक्दा पराजित हुन पुग्यो । शरद भेषावकर २७, पारस खड्का ४, सुमित महर्जन ७, पृथु बास्कोटा ८, सोमपाल कामी ४ र अमर सिंह राउटेला ७ रनमा आउट भए ।

कप्तान पारस र शरदलाई सुसन भारीले बोल्ड आउट गरे । त्यस्तै महर्जन र बास्कोटा भारीको एलबीडब्लू शिकार बने । सुसन भारीले ४ ओभरमा १८ रन खर्चेर ४ विकेट लिए । त्यस्तै करण केसी, दिपेन्द्र सिंह ऐरी र जितेन्द्र मुखियाले समान १ विकेट हात पारे । भारीनै म्यान अफ द म्याच चुनिए ।

यसअघि दर्शकहरुलाई मनोरन्ज प्रदान गर्नको लागि भएको पहिलो खेलमा आर्टिस ए ले आर्टिस बी लाई ५ रनले हरायो । मदनकृष्ण कप्तान समेत रहेको ए ले पहिला ब्याटिङ गर्दै निर्धारित १० ओभरमा ५ विकेट गुमाउँदै ७६ रन जोडेको थियो ।

उसका लागि कुमार कट्टेल (जिग्री)ले २६ बलमा ४ चौका र १ छक्का प्रहार गर्दै २९ रन बटुले । त्यस्तै हेम राज बिसीले १३ रन बटुले । २१ रन अतिरिक्त पाएको थियो । राजा राजेन्द्र,मिन राज पोखरेल र शिशिर भण्डारी र मोस्टे गुरुङले समान १ विकेट हात पारे ।

७७ रनको लक्ष्य पछ्पाएको सुनिल थापा कप्तान रहेको बीले निर्धारित १० ओभरमा ५ विकेटको क्षतिमा ७१ रन बनायो । उसका लागि मिराजन प्रधान १० र विरेन्द्र हमालले २० रन जोडे । ,अनोमल गुरुङ,सुरेश न्यौपाने र दिलिप ओखदाले समान एक विकेट लिए ।

जिग्री म्यान अफ द म्याच समेत चुनिए । खेलमा अर्जुन घिमिरे(पाडे)ले कमिनेन्टर गर्दै दर्शकलाई अझ मनोरन्जन प्रदान गरि रहेका थिए । आसा गरे अनुसार दर्शक भने खेल हेर्न आएका थिएनन् ।