एजेन्सी – रोयल च्यालेन्जर्स बेंगलोर इन्डियन प्रिमियर लिग (आईपीएल) बाट लिग चरणबाटै बाहिरि सकेको छ । वीरत कोहलीको नेतृत्वमा रहेको बेंगलोरले १४ खेलमा ५ मा जित र ८ मा हारका साथ १२ औं संस्करणको आईपीएल अन्त्य गरेको हो ।

बेंगलोर आगमी वर्ष उपाधि जित्ने लक्ष्यका साथ टोलीमा व्यापक फेरबदल सहित आउने सम्भावना बलियो रहेको छ । खेलाडी अनुसारको प्रर्दशन गर्न नसक्नु बेंगलोरको ठूलो समस्या बन्दै आएकोछ । भारतीय टोलीका समेत कप्तान रहेका कप्तान कोहली, एबी डी भिलियर्स, युजवेन्द्र चहल, उमेश यादव, टीम साउथी जस्ता खेलाडी रहेको बेंगलोर लिग चरणबाटै बाहिरिनु आफैंमा दुखद कुरा मानिन्छ ।

बेंगलोरले आगामी संस्करणमा खेलाडीमा निकै फेरबदल गर्न सक्ने अनुमान गरिएको छ । यस सिजनमा खराब प्रर्दशन गरेका खेलाडीलाई रिलिज गर्दै नयाँ खेलाडीलाई अनुबन्ध गर्ने निश्चित जस्तै छ । यो सिजनमा खराव प्रर्दशन गर्ने यी ६ खेलाडी जसलाई बेंगलोरले आगमी संस्करणको अक्सन अघि रिलिज गर्न सक्छ ।

६. अक्षदीप नाथ

बेंगलोरले नाथलाई अक्सनमा ३.६ करोड रुपैंया खर्च गरेर टोलीमा अनुबन्ध गरेको थियो । वैकल्पिक विकेटकीपरको रुपमा हेरिएका नाथले यो सिजनमा ८ खेल खेल्ने मौका पाए । तर उनको प्रर्दशन सम्झनलायक रहेन । नाथले ८ खेलमा १२.२० को औसतमा मात्र ६० रन बनाए । जसको कारण आगमी संस्करणमा बेंगलोरले नाथलाई रिलिज गर्न सक्छ ।

५. शिवम दुबे

युवा अल राउण्डर दुबेबाट बेंगलोरमात्र होइन समर्थकले पनि ठूलो आसा गरेका थिए । अक्सनमा बेंगलोरले उनलाई ५ करोड रुपैंया खर्चेर अनुबन्ध गरेको थियो । तर उनको प्रर्दशन खराब रह्यो । ४ खेलमा ४० रन बनाएका दुबेले कुनै पनि विकेट लिन सकेनन् । जसको कारण बेंगलोरले आगमी वर्ष उनलाई रिलिज गर्दै अर्को नयाँ खेलाडी टोलीमा अनुबन्ध गर्न सक्छ ।

४. कोलिन डी ग्रान्डहोम

डी ग्रान्डहोम जस्ता खेलाडी चल्न नसक्नु बेंगलोरको लागि दुर्भाग्य हो । विश्व क्रिकेटमा उत्कृष्ट अलराउन्डरको छवी बनाएका न्युजिल्यान्डका ओपनर होमलाई आगामी संस्करणमा बेंगलोरले रिलिज गर्न सक्छ । ४ खेलमा उनले ४६ रन मात्र बनाउन सके । बलिङतर्फ झण्डै ११ को औसतमा रन खर्चिदा कुनै विकेट लिन सकेनन् । यो सिजिनमा खराब प्रर्दशन गरेका कोलिन डी ग्रान्डहोमलाई बेंगलोरले आगमी वर्ष रिलिज गर्न सक्छ ।

३. पवन नेगी

गत वर्ष उत्कृष्ट प्रर्दशन गरेपछि नेगीलाई बेंगलोरले यो सिजनमा रिटेन गरेको थियो । तर उनको प्रर्दशन खराब रह्यो । सन् २०१६ मा ८.५ करोड खर्चेर टोलीमा उनलाई भित्र्याएको थियो । यस आईपीएलमा उनले ७ खेलमा मात्र ९ रन बनाउनुको साथै मात्र ३ विकेट लिए । यस अर्थमा आगामी सिजनमा बेंगलोरले नेगीलाई रिलिज गर्ने उच्च संभावना देखिन्छ ।

२. टिम साउदी

न्युजिल्यान्डका तीब्र गतिका बलर साउदीको प्रर्दशन पनि खराब रह्यो । नाथन कुटर नाईल चोटका कारण बाहिरिएपछि उनले टोलीमा मौका पाएका थिए । उनले ३ खेलमा १ विकेट लिए । इकोनमीक रेट १३ भन्दा माथि रह्यो । बेंगलोरले आगमी वर्ष साउदीलाई रिलिज गर्दै नयाँ तीव्र गतिको बलरलाई टोलीमा अनुबन्ध गर्न सक्छ ।

१. उमेश यादव

भारतीय टोलीका तीव्र गतिका बलर उमेश यादव चल्न नसक्नु बेंगलोरको बलिङ कमजोर सावित हुनुको प्रमुख कारण हो । गत वर्ष उत्कृष्ट प्रर्दशन गरेका यादवले यो वर्ष भने खराब प्रर्दशन गरे । यो सिजनमा यादवले ११ खेलमा मात्र ८ विकेट लिन सके । डेथ ओभरमा यादव धेरै पटक महँगो सावित हुँदा बेंगलोर पराजित हुन पुग्यो । उनको इकोनमी ९.८ रहेको छ । जसको कारण आगमी सिजनमा यादवलाई बेंगलोरले रिलिज गर्न सक्छ ।