काठमाडौं(हाम्रो खेलकुद) – कप्तान पारस खड्का रहेको प्रदेश ३ ले तेस्रो संस्करणकोे प्रधानमन्त्री राष्ट्रिय एक दिवसिय क्रिकेट प्रतियोगितामा पहिलो जित हात पारेको छ ।

सोमबार मुलपानी क्रिकेट मैदानमा भएको खेलमा प्रदेश ५ लाई ६ विकेटले पराजित गर्दै प्रदेश ३ ले पहिलो जित निकालेको हो । यस अघि पहिलो खेलमा प्रदेश ३ एपीएफसँग ४१ रनले पराजित भएको हो । १ सय २३ रनको लक्ष्य पछ्याएको प्रदेश ३ ले २१.५ ओभरमा ४ विकेटको क्षतिमा पुरा गर्यो ।
उसका लागि ओपनर रित गौतमले सर्वाधिक ३७ रनकोे योगदान दिए । ११ ओभरको पाँचौ बलमा अनिल खरेलले सुवेन्द्र पाण्डेबाट क्याच गर्नु अघि २९ बलमा ७ चौका प्रहार गरेका थिए । त्यस्तै अर्का ओपनर रविन जोशीले ३५ रनको योगदान दिए । ओपनर रित र रविनले पहिलो विकेटका लागि १०.५ ओभरमा ७२ रनको साझेदारी गर्दै सहज जित तर्फ लम्काए । १३ ओभरको पाँचौ बलमा खरेललेनै सिद्धान्त शाहीबाट क्याच गराउनु अघि जोशीले ४१ बलमा ५ चौका प्रहार गरे ।
१५ ओभरको चौथो बलमा सिद्धान्त शाहीले कप्तान पारस खड्कालाई १ रनमा क्याच गराउँदै पेभिलिएन फर्काएपछि प्रदेश तीन केहि दवाबमा परेको थियो । मध्यक्रमका ईशान पाण्डेले २१ रनको अविजित इनिङ खेल्दै सहज जित पक्का गरे । अभिषेक बस्नेत २ रनमा आउट हुँदा आदिल खानले १२ रन जोडे । प्रदेश ५ का अनिल खरेल र सिद्धान्त शाहीले समान २ विकेट हात पारे ।

त्यस अघि मुलपानीमा टस हारेर पहिला ब्याटिङ थालेको प्रदेश ५ ले ४२ ओभरमा १ सय २२ रन बनाउन अल आउट भएको थियो । प्रदेश ५ का लागि सवेन्दु पाण्डेले ३९ बलको सामना गर्दै ३ चौका सहित सर्वाधिक २० रनको योगदान दिए । सुरज दराई १८, सन्दीप सुनार १४ र सौरभ खनालले १३ रन जोड्न बाहेक अन्य कुनै पनि ब्याट्सम्यानले दोहोरो अंकमा रन जोड्न सकेनन् ।

प्रदेश ३ को कसिलो बलिङ सामु प्रदेश ५ का ७ ब्याट्सम्यानले दोहोरो अंकमा रन बटुल्न सकेनन् । प्रदेश ३ का लागि कप्तान पारस खड्काले १० ओभरमा ३ मेडन सहित २४ रन खर्चेर ४ विकेट लिए । सुर्य तामाङले १० ओभरमा ३ मेडन सहित १६ रन खर्चेर ३, नन्दन यादव २,प्रतिस जिसीले १ विकेट हात पारे ।