काठमाडौं (हाम्रो खेलकुद) – पारस खड्का कप्तान रहेको प्रदेश ३ ले प्रधानमन्त्री राष्ट्रिय एक दिवसिय क्रिकेट प्रतियोगितामा लगातार दोस्रो जित हासिल रहेको छ ।
मंगलबार गण्डकी प्रदेशलाई ७ विकेटले पराजित गर्दै प्रदेश ३ ले लगातार दोस्रो जित हात पारेको हो । पहिलो खेलमा एपीएफसँग ४१ रनले पराजित भएको प्रदेश ३ ले सोमबार प्रदेश ५ लाई ६ विकेटले पराजित गरेको थियो ।
१ सय ९ रनको सामान्य लक्ष्य प्रदेश ३ ले २२.२ ओभरमा ३ विकेटको क्षतिमा पुरा गर्यो । उसका लागि आदिल खान ५३ बलमा ५ चौका सहित ३८ रनमा नट आउट रहे । त्यस्तै चौका हान्दै खेल सकाएका ईशान पाण्डेले ४० बलमा ४ चौका सहित २६ रनमा अविजित रहे ।
सातौ ओभरको पहिलो बलमा किशोर महतोले ओपनर रित गौतमलाई २० रनमा बोल्ड आउट गरे । रितले २२ बलमा ४ चौका प्रहार गरे । त्यसै ओभरको पाँचौ बलमा महतोले आफैं क्याच लिदै अर्का ओपनर रविन जोशीलाई ११ रनमा पेभिलिएन फर्काए । विपिन खत्रीले अभिषेक बस्नेतलाई ८ औं ओभरको दोस्रो बलमा ५ रनमा बोल्ड आउट गरृपछि ४१(३ को अवस्थामा पुगेको प्रदेश ३ लाई इशान र आदिलले चौथो विकेटका लागि ७१ रनको अविजित साझेदारी गर्दै सहज जित पक्का गरे । गण्डकीलाई लागि किशोर महतोले २ र विपिन खत्रीले १ विकेट हात पारे ।
त्यस अघि मंगलबार टियू क्रिकेट मैदानमा टस जितेर पहिला ब्याटिङ थालेको गण्डकी ३०।१ ओभरमा अल आउट हुँदै १ सय ८ रनमा समेटियो । उसका लागि सुमन घिमिरेले ३२ बलमा ३ छक्का र १ चौका सहित ३४ रनको योगदान दिए । त्यस्तै आकाश थापाले ४६ बलमा २ चौका सहित २८ रन जोड्न बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् ।
एक समय ५०(६ को स्थितिमा रहेको गण्डकीलाई सुमन र आकाशको ५३ रनको साझेदारीले उकासेको थियो । प्रदेश ३ को कसिलो बलिङ सामु गण्डकीका ८ ब्याट्सम्यानले दोहोरो अंकमा रन बटुल्न सकेनन् । अनिल गुरुङ ७, विधान श्रेष्ठ २, मेख शेन ५, विशाल पौडेल डक र कप्तान गोविन्द प्रधान ३ रनमा आउट भए ।
प्रदेश ३ का कप्तान पारस खड्काले ८ ओभरमा १ मेडन सहित १८ रन खर्चेर ४ विकेट लिए । त्यस्तै युवा स्पिनर सुर्य तामाङले ८।१ ओभरमा १ मेडन सहित २९ रन खर्चेर ४ विकेट लिएपछि गण्डकी सस्तैमा समेटिएको हो । नन्दन यादवको नाममा २ विकेट रह्यो ।
