काठमाडौं (हाम्रो खेलकुद) – स्पिनर सुशन भारीले पुन घातक बलिङ गरेपछि त्रिभुवन आर्मी क्लवले लगातार तेस्रो जित हात पारेको छ । मंगलबार कर्णाली प्रदेशलाई १ सय १७ रनले पराजित गर्दै सेमिफाइनल नजिक पुगेको हो ।

पहिलो खेलमा आर्मीले प्रदेश २ लाई १ सय ७१ रनको र दोस्रो खेलमा प्रदेश १ लाई १ सय १३ रनले फराकिलो अन्तरले पराजित गरेको थियो । आर्मीले अन्तिम खेल अब जेठ १८ मा नेपाल पुलिसँग खेल्ने छ । २ सय ९१ रनको लक्ष्य पछ्पाएको कर्णाली प्रदेश ३५.१ ओभरमा अल आउट हुँदै १ सय ७३ रनमा समेटियो ।

उसका लागि ओपनर सुसान्त थापाले सर्वाधिक ३१ रनको योगदान दिए । १३ ओभरको अन्तिम बलमा हरि बहादुर चौहानले विकेटकीपर राजु रिजालबाट क्याच आउट गराउनु अघि उनले ३५ बलमा ५ चौका प्रहार गरे । त्यस्तै कप्तान रविन्द्रजंग शाहीले १३ रन जोडे ।

कुनै समय २७ ओभरमा १२०-९ को अवस्थामा पुगेको कर्णालीलाई अन्तिम विकेटका लागि ललित प्याकुरेल र युनिस सिंहले ५३ रनको साझेदारी गर्दै हारको अन्तर हटाए । ललित प्याकुरेलले २८ बलमा ३ चौका र १ छक्का सहित २८ रनको योगदान दिए । त्यस्तै युनिस सिंहले २७ बलमा २ चौका र १ छक्का प्रहार गर्दै २० रनको योगदान दिए ।

उसका अन्य दिवान पुनले ३३ बलमा ३ चौका सहित २६ रनको योगदान दिए । त्यस्तै दिनेश अधिकारी ११,सौगात कार्की ९,महेश खत्री ५,प्रकाश जैसी डक आउट भए ।

आर्मीलाई सहज दिलाउन सुशन भारीलाई ९ ओभरमा ३६ रन खर्चेर ४ विकेट लिए । त्यस्तै करण केसी र साहव आलमले समान २ विकेट लिए । हरि बहादुर चौहान र कुशल मल्लको नाममा समान १ विकेट रह्यो ।

त्यस अघि मुलपानीमा टस हारेर ब्याटिङको निम्तो पाएको आर्मीले निर्धारित ५० ओभरमा ९ विकेट गुमाउँदै २ सय ९० रन बनायो । युवा खलाडी रोहित कुमार पौडेलले ५६ रनको योगदान दिए । ४८ ओभरको पहिलो बलमा प्रकाश जोशीले रविन्द्रजंग शाहीबाट क्याच गराउनु अघि रोहितले ५१ बलमा ४ चौका प्रहार गरे ।

ओपनर राजु रिजाल र हरेकृष्ण झाले पहिलो विकेटका लागि २८।३ ओभरमा १ सय ३२ रनको उत्कृष्ट साझेदारी गर्दै सानदार सुरुवात दिलाए । ललित प्याकुरेलले राजुलाई एलबीडब्लू आउट गर्दै शतकीय साझेदारी तोडे । राजुले ७८ बलमा १० चौका सहित ६६ रन जोडे । ३१ ओभरको पाँचौ बलमा दिनेश अधिकारीले रन आउट गर्नु अघि झाले १ सय बलको सामना गर्दा ४ चौका सहित ५२ रन जोडे । हरि बहादुर चौहान ११, राजेश पुलामी मगर र कुशल मल्ल समान २ र कप्तान विनोद भण्डारी ५ रनमा आउट भएपछि आर्मी ३६ ओभरमा १६९–५ को अवस्थामा पुगेको थियो ।

छैटौं विकेटका लागि रोहित कुमार पौडेल र करण केसीले ८.४ ओभरभित्र ६७ रनको उत्कृष्ट साझेदारी गर्दै बलियो योगफल सम्म पुर्याए । यी दुईबीचको साझेदारी ४५ ओभरको पाँचौ बलमा प्याकुरेलले रविन्द्रजंग शाहीबाट करणलाई २८ रनमा क्याच आउट गराउदै तोडे । करणले २६ बलमा २ चौका र १ छक्का प्रहार गरे । अन्तिम समयमा साहब आलमले २ चौका र १ छक्का प्रहार गर्दै १६ रनमा अविजित रहे ।

कर्णालीका लागि ललित प्याकुरेलले ९ ओभरमा ६३ रन खर्चेर ५ विकेट लिए । त्यस्तै कप्तान रविन्द्रजंग शाही २ र प्रकाश जैशी नाममा १ को विकेट रह्यो ।