काठमाडौं (हाम्रो खेलकुद) – अलराउन्डर दिपेन्द्र सिंह ऐरीको घातक बलिङ र अमित श्रेष्ठले शतक प्रहार गरेपछि तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगितामा नेपाल पुलिस क्लवले लगातार दोस्रो जित निकालेको छ ।
बुधबार मुलपानी क्रिकेट मैदानमा पुलिसले प्रदेश १ लाई ७५ रनले पराजित गर्दै दोस्रो जित निकालेको हो । यस अघि पहिलो खेलमा पुलिसले कर्णाली प्रदेशलाई ९४ रनले पराजित गरेको थियो । पुलिसले तेस्रो खेल अब आर्मीसँग जेठ १८ गते शनिबार टियू मैदानमा प्रतिस्पर्धा गर्ने छ । पुलिसले प्रस्तुत गरेको १ सय ८६ रनको मध्यम लक्ष्य पछ्याएको प्रदेश १ ले ३८.३ ओभरमा १ सय १० रन बनाउन सबै विकेट गुमायो । उसका लागि ओपनर सन्नी पुनले सर्वाधिक २७ रनको योगदान दिए । २४ ओभरको दोस्रो बलमा दिपेन्द्रले आफैं क्याच लिदै पेभिलिएन फर्काउनु अघि ५९ बलमा ४ चौका प्रहार गरे ।
प्रदेश १ ले पहिलो विकेटको रुपमा राजन मगरलाई २ रनमा गुमाएको थियो । २० ओभरको दोस्रो बलमा दिपेन्द्रले सिद्धान्त लोहनीलाई ४ रनमा क्याच आउट गराए । दिपेन्द्रले २६ ओभरको पाँचौ बलमा मिनाष थापालाई १९ रनमा बोल्ड आउट गरे । दिपेन्द्रले ३२ ओभरको अन्तिम बलमा दिपेश कडेललाई १५ रनमा बोल्ड आउट गरेपछि प्रदेश १ को जितको संभावना लगभग सकिएको थियो ।
प्रदेश १ का कुनै पनि ब्याट्सम्यानले क्रिजमा टिकेर रन जोड्न सकेनन् । कप्तान पुष्प थापा १०,अंकित सुवेदी ३,फ्रिदोस अन्सारी १२ र श्रवन यादव ५ रनमा आउट भए ।
पुलिसलाई सहज जित दिलाउन दिपेन्द्र सिंह ऐरीले १० ओभरमा ४ मेडन सहित २६ रन खर्चेर ५ विकेट लिए । ललित नारायण राजवंशीले ३, सागर ढकाल र आरिफ शेखको नाममा समान १ विकेट रह्यो ।
त्यसअघि टस जितेर पहिला ब्याटिङ थालेको पुलिस ४३.१ ओभरमा अल आउट हुँदै १ सय ८५ रनमा समेटिएको थियो । पुलिसका लागि अमित श्रेष्ठले १ सय ६ रनको शतकीय योगदान दिए । सिद्धान्त लोहनीले ४३ ओभरको चौथो बलमा विकेटकीपर राजन मगरबाट क्याच आउट गराउनु अघि उनले १ सय १८ बलमा १५ चौका र १ छक्का प्रहार गरे । अमित बाहेक अन्य कुनै पनि ब्याट्सम्यानले राम्रो प्रर्दशन गर्न नसक्दा पुलिस सस्तैमा समेटिएको हो ।
पुलिसका अन्य ओपनर पवन सरार्फ १०, अनिल कुमार शाह ४, दिपेन्द्र सिंह ऐरी २, आरिफ शेख ४, दिलिप नाथ १, कुशल भुर्तेल २४ रनमा आउट भए । त्यस्तै कप्तान मञ्जित श्रेष्ठ र रा नरेश गिरीले समान ११ रन बटुले ।
पुलिसलाई सस्तैमा रोक्न प्रदेश १ का सिद्धान्त लोहनी, दिपेश कँडेल, पुष्प थापा, फिर्दोस अन्सारी र कमल खत्रीले समान २ विकेट हात पारे ।
