काठमाडौं (हाम्रो खेलकुद)– गौतम बुद्ध अन्तर्राष्ट्रिय क्रिकेट रंगशालाको पश्चिमतर्फको बार भत्काउन नेतृत्व गर्ने प्रकाश कँडेललाई नेपाल कम्युनिष्ट पार्टी (नेकपा) चितवनले निलम्बन गरेको छ ।
नेकपा चितवनका अध्यक्ष यम बहादुर परियारले पार्टी सदस्य कँडेललाई निलम्बन गरेको बताएका छन् । ‘पार्टीले गर्ने कारवाही भनेको निलम्बन नै हो,’ अध्यक्ष परियारले हाम्रो खेलकुदसँग भने,‘अरु कारवाही गर्ने प्रशासनले गर्ने हो ।’ कँडेललाई चितवन प्रशासनले मंगलबार रातीनै प्रकाउ गरि अनुसन्धान थालेको जनाएको छ ।
चितवनको भरतपुर महानगरपालिका वडा नं १५ स्थित रामपुर शान्तिचोकमा धुर्मुस–सुन्तली फाउन्डेसनले रंगशाला निर्माणको काम सुरु गरको थियो ।
कँडेलको नेतृत्वमा झन्डै २ सय जना स्थानियको समुहले बुधबार बिहान परियोजनाको पश्चिमतर्फ बाटो चौडा पार्नुपर्ने माग गर्दै डोजर लगाएर बार भत्काएका थिए ।
बार मंगलबारमात्रै लगाइएको थियो । स्थानिय समूहले डोजर लगाएर भत्काइदिएपछि फाउन्डेसनले तत्कालका लागि रंगशालाको निमार्णको काम स्थगित गरेको छ ।
