काठमाडौं (हाम्रो खेलकुद) – लेग स्पिनर कुमार थापाले अविश्वसनिय बलिङ गर्दै एक्लै ७ विकेट लिएपछि तेस्रो संस्करणको प्रधानमन्त्री राष्ट्रिय एकदिवसिय प्रतियोगितामा प्रदेश २ ले फराकिलो जित हात पारेको छ ।

प्रदेश २ ले शनिवार मुलपानी क्रिकेट मैदानमा प्रदेश १ लाई १ सय ६१ रनको फराकिलो अन्तरले पराजित गरेको छ । यो हारसँगै सिद्धान्त लोहनी सम्मिलित प्रदेश १ समुह चरणबाटै बाहिरिएको छ । यद्ययी अघिल्लो खेलमा खुट्टामा चोटका कारण सिद्धान्त आजको खेलमा टोलीमा थिएनन् ।

२ सय ६६ रनको लक्ष्य पछ्याएको प्रदेश १ ओभरमा २८.५ ओभरमा १ सय ४ रनमा अल आउट भयो । उसका लागि सन्नी पुनले २९ र मिनास थापाले ३६ रन जोड्न बाहेक अन्य कुनैपनि ब्याट्सम्यानले दोहोरो अंकमा रन बटुल्न सकेनन् ।

दोस्रो ओभरको दोस्रो बलमा राजन मगरलाई ब्यक्तिगत १ रनमा गुमाएको थियो । दोस्रो विकेटका लागि मिनास र सन्नीले ६२ रनको साझेदारी गर्दै प्रदेश १ को इनिङ केहि उकासेका थिए । १४ ओभरको दोस्रो बलमा कुमार थापाले साम्सद शेखबाट क्याच गराउँदै साभेदारी तोडेपछि प्रदेश १ को विकेट पतन निरन्तर गुम्न पुग्यो । मिनासले ३५ बलमा ३ चौका र २ छक्का प्रहार गरे । १६ ओभरको चौथो बलमा कुमारलेनै एलवी डब्लू आउट गर्नु अघि उनले ४८ बलमा २ चौका र १ छक्का प्रहार गरे ।

मुकुन्द यादव डक, दिपेश कडेल ३, अकिंत सुबेदी २, कप्तान पुष्प थापा ९, फिर्दोस अन्सरी ३, श्रवन यादव ५ रनमा आउट भए । यी ६ ब्याट्सम्यान नै कुमारको सिकार बन्न पुगे । सरोज बस्नेत ६ रनमा अविजित रहे । प्रदेश २ का कुमार थापाले ८ ओभरमा २ मेडन सहित २२ रन खर्चेर ७ विकेट लिए । दिवान्सु मलिकको नाममा २ विकेट रह्यो ।

त्यस अघि तल्लोक्रमका युवा अलराउन्डर राशिद खानको आक्रमण ब्याटिङ र सुरज पटेलको उत्कृष्ट अर्धशतकमा प्रदेश २ ले प्रदेश १ विरुद्ध बलियो योगफल प्रस्तुत गरेको थियो । प्रदेश २ ले निर्धारित ५० ओभरमा ९ विकेट गुमाउँदै २ सय ६५ रनको योगफल तयार पारेको थियो ।

ओपनर हसीम अन्सारीले २० र हरिशंकर साहले ३१ रन जोड्दै प्रदेश २ लाइ बलियो सुरुवात दिलाएका थिए । त्यसपछि ब्याटिङमा आएका रवी शाह र विशाल सुस्लिङले पनि २०-२० रनको योगदान दिए । ३२ औं ओभरमा १३१-४ को स्थितिमा रहेका प्रदेश २ लाई सुरज पटेलले उकासेका थिए । कप्तान महबुब आलम १९ र विवेक यादव ४ रनमा आउट भएपछि राशिद क्रिजमा आएका थिए ।

राशिद र सुरजले सातौं विकेटका लागि ९ ओभरमा ६७ रनको साझेदारी गरेका थिए । राशिदले ३१ बलमा ४७ रन जोडे । उनले २ चौका र ५ छक्का प्रहार गरे । सुरजले नटआउट ७८ रन जोडे । उनले ७० बलको सामना गर्दै ६ चौका र ३ छक्का प्रहार गरे ।

प्रदेश १ का लागि पुष्प थापाले ३, सरोज बस्नेतले २ तथा कमल खत्री, फिर्दोस अन्सारी र मुकुन्द यादवले १-१ विकेट लिए ।