काठमाडौं (हाम्रो खेलकुद) – त्रिभुवन आर्मी क्लव काठमाडौंमा जारी तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगिताको फाईनलमा प्रवेश गरेको छ ।

आर्मीले बुधबार सेमिफाईनल खेलमा पारस खड्का कप्तान रहेको प्रदेश ३ लाई १ सय १७ रनको फराकिलो अन्तरले पराजित गर्दै फाईनलमा स्थान पक्का गरेको हो । उपाधिको लागि आर्मीले विहीबार हुने दोस्रो सेमिफाईनलमा एपीएफ र पुलिसको विजेतासँग जेठ २५ मा प्रतिस्पर्धा गर्ने छ ।

३ सय १० रनको विशाल लक्ष्य पछ्याएको प्रदेश ३ ले निर्धारित ५० ओभरमा ९ विकेट गुमाउँदै १ सय ९२ रन मात्र बनाउन सक्यो ।

उसका लागि युवा ब्याट्सम्यान ईशान पाण्डेले सर्वाधिक ७९ रन बनाउन बाहेक अन्यले राम्रो प्रर्दशन गर्न सकेनन् । ४८ ओभरको चौथो बलमा करण केसीले कुशल मल्लबाट क्याच आउट गराउनु अघि इशानले १ सय १७ बलमा ३ चौका र ४ छक्का प्रहार गरे । नन्दन यादव ६६ बलमा १ छक्का सहित १८ रनमा अविजित रहे ।

प्रदेश ३ ले ओपनर रित गौतमलाई ५ रनमा रनमा पहिलो विकेटका रुपमा गुमाएको थियो । दोस्रो विकेटका रुपमा रविन जोशी तेस्रो ओभरको चौथो बलमा ८ रनमा क्याच आउट भए । जोशीलाई करण केसीले साहब आलमबाट क्याच आउट गराए । तेस्रो विकेटका रुपमा कप्तान पारस खड्का १९ रनमा आउट भएपछि विशाल लक्ष्य पछ्याएको प्रदेश ३ संकटमा परेको थियो ।

पारसलाई ११ ओभरको पाँचौ बलमा साहब आलमले हरि बहादुर चौहानबाट क्याच आउट गराउनु अघि १६ बलमा ३ चौका प्रहार गरे । २० औं ओभरको पहिलो बलमा सुसन भारीले कुशल मल्लबाट क्याच गराउँदै ज्ञानेन्द्र मल्ललाई २६ रनमा पेभिलिएन फर्काएपछि प्रदेश ३ को जित कठिन बनेको थियो । मल्लले ३३ बलमा २ चौका र १ छक्का प्रहार गरे । आदिल खान १५,जितेन्द्र सिंह ठकुरी डक,सोनु तामाङ २ र सोनु देवकोटा शुन्यमा आउट भएपछि प्रदेश ३ को जितको संभावना सकिएको थियो ।

आर्मीका लागि साहव आलमले सर्वाधिक ३ विकेट लिए । करण केसीले २,सुशन भारी,रोहित कुमार पौडेल र कुशल मल्लले समान १ विकेट हात पारे ।

त्यस अघि कीर्तिपुर क्रिकेट मैदानमा टस हारेर पहिला ब्याटिङ थालेको आर्मीले निर्धारित ५० ओभरमा ६ विकेटको क्षतिमा ३ सय ९ रन बनायो । कप्तान विनोद भण्डारीले विष्फोटक ब्याटिङ गर्दै मात्र ४२ बलमा समान ५ चौका र छक्का सहित ७५ रनमा अविजित रहेपछि आर्मी विशाल योगफलमा पुगेको हो ।

४८ औं ओभरमा सुर्य तामाङलाई विनोद भण्डारीले पहिलो बलमा छक्का र चौका तथा कुशल मल्लले चौथो र पाँचौ बलमा छक्का र अन्तिम बलमा चौका प्रहार गर्दै २७ रन बटुलेपछि आर्मी बलियो योगफल नजिक पुगेको थियो । कुशल मल्ले १७ बलमा १ चौका र २ छक्का सहित २६ रनमा अविजित रहे । कुशल र विनोदले अन्तिम ५।५ ओभरमा विश्फोटक ब्याटिङ गर्दै ६३ रनको साझेदारी गरेपछि बिशाल योगफल तयार भएको हो ।

आर्मीले सुस्त सुरुवात गरेको थियो । १२ ओभरको पहिलो बलमा ओपनर हरिकृष्ण झालाई ब्यक्तिगत १२ रनमा गुमाउँदा आर्मीले २३ रन मात्र जोडेको थियो । दोस्रो विकेटका लागि हरि वहादुर चौहान र ओपनर राजु रिजालले ७३ रनको साझेदारी गर्दै आर्मीको इनिङ उकासे । यी दुईबीचको साझेदारी २३ ओभरको दोस्रो बलमा कप्तान पारस खड्काले चौहानलाई ३८ रनमा एलवी डब्लू आउट गर्दै तोडे । चौहानले ३७ बलमा ४ चौका र १ छक्का प्रहार गरे । २८ ओभरको दोस्रो बलमा ओपनर रिजाललाई नन्दन यादवले ५१ रनमा बोल्ड आउट गरे । राजुले ८६ बलको सामना गर्दा ४ चौका र २ छक्का प्रहार गरेका थिए । राजेश पुलामी मगरले ३९ बलमा २ चौका प्रहार गर्दै २९ रनको योगदान दिए ।

मध्यम क्रममा रोहित कुमार पौडेलले ३५ बलमा ४ चौका र १ छक्का सहित ४३ रन जोडेपछि आर्मी विशाल योगफल तर्फ लम्केको थियो । रोहितलाई ३६ ओभरको तेस्रो बलमा सोनु देवकोटाले विकेटकीपर रविन जोशीबाट क्याच गराउँदै पेभिलिएन फर्काका थिए ।

रोहित आउट भएसँगै मैदान छिरेका कप्तान विनोद भण्डारीले तल्लोक्रममा विश्फोटक ब्याटिङ गरेपछि आर्मीले प्रदेश ३ विरुद्ध बलियो योगफल तयार पारेको हो ।तल्लोक्रममा करण केसीले १४ बलमा २ चौका र १ छक्का सहित २१ रन जोडे । प्रदेश ३ का लागि जितेन्द्रसिंह ठकुरी र नन्दन यादवले समान २ विकेट लिए । कप्तान पारस खड्का र सोनु देवकोटाको नाममा समान १ विकेट रह्यो ।