एजेन्सी – न्युजिल्यान्डले एकदिवसिय विश्वकप क्रिकेट प्रतियोगितामा लगातार दोस्रो जित निकालेको छ । बुधबार राती बंगलादेशलाई २ विकेटले पराजित गर्दै लगातार दोस्रो जित हात पारेको हो । यसअघि पहिलो खेलमा न्युजिल्यान्डले श्रीलंकालाई १० विकेटले हराएको थियो ।
जितका लागि २ सय ४५ रनको लक्ष्य पछ्याएको न्युजिल्यान्डले ४७.१ ओभरमा ८ विकेटको क्षतिमा पुरा गर्यो । उसका लागि अनुभवी ब्याट्सम्यान रोश टेलरले सर्वाधिक ८२ रनको योगदान दिए । ३९ ओभरको तेस्रो बलमा मोसाद्देक हसनले मुश्फिकुर रहिमबाट क्याच आउट गराउनु अघि उनले ९१ बलमा ९ चौका प्रहार गरे । त्यस्तै कप्तान केन विलियम्सनले ४०, ओपनर मार्टिन गुप्टिलले २५,कोलिन मुनरो २४ रनमा क्याच आउट भए ।
विकेटकीपर टम लेथम डक,जेम्श निशम २५,कोलिन डी ग्राण्डहोम १५,म्याट हेनरी ६ रनमा आउट भए । मिचेल सान्टनर १७ र ल्योकी फग्र्युसन ४ रनमा अविजित रहदै जित पक्का गरे । बंगलादेशका लागि मेहेदी हसन,सकिब अल हसन,मोहम्मद सैफुद्दीन र मोसाद्देक हसनले समान २ विकेट लिए पनि टोलीको हार टार्न सकेनन् ।
त्यसअघि लन्डन स्थित ओभल क्रिकेट मैदानमा टस हारेर पहिला ब्याटिङको निम्तो पाएको बंगलादेश ४९.२ ओभरमा अल आउट हुँदै २ सय ४४ रनमा समेटियो । बंगलादेशका लागि सकिब अल हसनले सर्वाधिक ६४ रनको योगदान दिए । ३१ ओभरको दोस्रो बलमा कोलिन डी ग्राण्डहोमले विकेटकीपर टम लेथमबाट क्याच गराउनु अघि सकिबले ६८ बलमा ७ चौका प्रहार गरे ।
बंगलादेशले पहिलो विकेटका रुपमा नवौं ओभरको तेस्रो बलमा सौम्य सरकारलाई २५ रनमा गुमाएको थियो । उनलाई म्याट हेनरीले बोल्ड आउट गरे । अर्का ओपनर तामिम इकवालले ३८ बलमा ३ चौका सहित २४ रनमा क्याच आउट भए । भरपर्दा ब्याट्सम्यान तथा विकेटकीपर मुश्फिकुर रहिमले ३५ बलमा २ चौका सहित १९ रन जोडे ।
३८ ओभरको पहिलो बलमा मोहम्मद मिथुनलाई हेनरीलेनै क्याच आउट गराउँदै २६ रनमा पेभिलिएन फर्काए । महमदुल्ला २०, मोसाद्देक हसन ११, मेहदी हसन मिराज ७ रनमा आउट भए । तल्लोक्रममा मोहम्मद सैफुद्दीनले २३ बलमा ३ चौका १ छक्का सहित २९ रनमा बोल्ड आउट भए । न्युजिल्यान्डका लागि म्याट हेनरीले ९.२ ओभरमा ४७ रन खर्चेर ४ विकेट लिए । टेन्ट्र बोल्टले २, कोलिन डी ग्राण्डहोम,मिचेल सान्टनर र ल्योकी फग्र्युसनले समान १-१ विकेट लिए ।
न्युजिल्यान्डले आफ्नो तेस्रो खेल आगमी शनिवार अफगानिस्तानसँग खेल्ने छ । त्यस्तै बंगलादेशले शनिवारनै उपाधिको दावेदार इंग्ल्यान्डको सामना गर्ने छ ।
