एजेन्सी – घरेलु मैदानमा पहिलो पटक एकदिवसिय विश्वकप उपाधि जित्ने सुनौलो अवसर रहको इंग्ल्यान्डले आइतबार फाइनलमा न्युजिल्यान्डसँग प्रतिस्पर्धा गर्दै छ ।

सन् १९७९, १९८७ र १९९२ को फाइनलमा पराजित हुँदै तीन पटक उप विजेतामा निराश बनेको इंग्ल्यान्ड यस पटक भने च्याम्पियन बन्न चाहान्छ । तेस्रो स्थानमा रहेर सेमिफाइनल खेलेको घरेलु टोली इंग्ल्यान्डले पाँच पटकको विजेता अष्टेलियालाई सेमिफाइनलमा ८ विकेटले पराजित गर्दै फाइनलमा स्थान बनाएको थियो । यता न्युजिल्यान्ड पनि उपाधिको प्रमुख दाबेदार भारतलाई सेमिफाईनलमा १८ रनले पराजित गर्दै फाइनलमा लगातार स्थान बनाउन सफल रह्यो । तुलानात्मक रुपमा न्युजिल्यान्ड भन्दा इंग्ल्यान्ड बलियो देखिन्छ । लिग चरणको खेलमा इंग्ल्यान्डले न्युजिल्यान्डलाई १ सय १९ रनको फराकिलो अन्तरले पराजित गरेको थियो ।

यस विश्वकपले नयाँ विजेता पाउने छ । न्युजिल्यान्डले पनि हालसम्म उपाधि जित्न सकेको छैन । सन् २०१५ विश्वकप फाइनलमा न्युजिल्यान्ड अष्ट्रेलियासँग पराजित भएको थियो । इंग्ल्यान्ड लिग चरणको नतिजा फाइनलमा निरन्तरता दिन चाहान्छ । यी ४ खेलाडी जसले आफ्नो उत्कृष्ट प्रर्दशनमा इंग्ल्यान्डलाई पहिलो पटक विश्वकपको उपाधि दिलाउन सक्छन् ।

४. जेसन रोय (ब्याट्सम्यान)

उत्कृष्ट लयमा रहेका ओपनर जोसन रोयको प्रर्दशन इंग्ल्यान्डको लागि महत्वपूर्ण हुने छ । २७ वर्षपछि इंग्ल्यान्डलाई फाइनलमा पुर्याउन उत्कृष्ट प्रर्दशन गरि रहेका रोयले अष्टे«लियासँगको सेमिफाइनल खेलमा ८५ रनको महतवपूर्ण इनिङ खेल्दै फाइनलमा स्थान पक्का गरेका थिए । रोयले भारतसँगको खेलमा ६६ र न्युजिल्यान्डसँगको खेलमा ६० रन जोडेका थिए । उनले जारी विश्वकपमा ६ इनिङमा १ शतक र ४ अर्ध शतक सहित कुल ४ सय २६ रन बनाएका छन् ।

रोयले बंगलादेशविरुद्ध १ सय ५३ रनको उत्कृष्ट इनिङ खेलेका थिए । उनले ८० वान डे इनिङमा ९ शतक र १८ अर्ध शतक सहित कुल ३ हजार ३ सय ६४ रन बनाएका छन् । ओपनर रोय ठूला सर्ट र इनिङको लागि परिचित छन् । रोयले आफ्नो एक्लो प्रर्दशनमा टोलीको सहज जित पक्का गर्न सक्छन् । फाइनलमा इंग्ल्यान्डले पनि रोयबाट त्यस्तै उत्कृष्ट प्रर्दशनको अपेक्षा गरेको छ ।

३. बेन स्टोक्स (अलराउन्डर)

अलराउन्डर बेन स्टोक्सको प्रर्दशन इंग्ल्यान्डको लागि निर्णायक बन्न सक्छ । स्टोक्स दबाबमा रन बटुल्न र ठूला सर्ट खेल्न माहिर छन् । जारी विश्वकपमा उत्कृष्ट प्रर्दशन गरेका स्टोक्सले ९ खेलमा ४ अर्ध शतक सहित ३ सय ८१ रन बनाई सकेका छन् । स्टोक्सले अष्ट्रेलियाविरुद्ध समुह चरणमा ८९ रनको उत्कृष्ट इनिङ खेलेका थिए । त्यस्तै श्रीलंकासँगको खेलमा ८२ रनमा अविजित रहे । स्टोक्स तल्लोक्रममा ठूला ठूला प्रहार गर्न सक्छन् ।

स्टोक्सले ब्याटिङमात्रै होइन तीव्र गतिमा बलिङबाट टोलीको जित सहज बनाउन सक्छन् । उनले जारी विश्वकपका ९ खेलमा ८ विकेट लिएका छन् । स्टोक्सले ८० वान डे इनिङमा ३ शतक र १९ अर्ध शतक सहित कुल २ हजार ५ सय ९८ रन बनाएका छन् । त्यस्तै ७९ वान डे इनिङमा उनले ७० विकेट लिएका छन् । जसमा उत्कृष्ट प्रर्दशन ५– ६१ छ । स्टोक्सले आफ्नो अलराउण्डर प्रर्दशनमा इंग्ल्यान्डलाई पहिलो उपाधि पक्का गर्न सक्छन् ।

२. जो रुट (ब्याट्सम्यान)

जो रुट इंग्ल्यान्डका शीर्षक्रमका सर्वाधिक भरपर्दा ब्याट्सम्यान हुन् । टोलीको आवश्यकता अनुसार खेल्ने उनलाई आउट गर्न जो कोही बलरलाई कठिन पर्ने गर्दछ । रुट बाउन्ड्री भन्दापनि डबल सिंगल रनमा बढि ध्यान दिने गर्दछन् । डवल सिंगल रनबाटै रुटले बलरलाई दबाबमा राख्ने गर्दछन् ।

रुटले जारी विश्वकपमा १० खेलमा २ शतक र ३ अर्ध शतक सहित कुल ५ सय ४९ रन जोडेका छन् । रुट अष्ट्रेलियासँगको सेमिफाइनल खेलमा ४९ रनमा अविजित रहँदै जित पक्का गरेका थिए । उनले पाकिस्तान र वेस्ट इन्डिजको खेलमा शतक प्रहार गरेका थिए । रुटले १ सय ३४ वान डे इनिङमा १६ शतक र ३३ अर्ध शतक सहित कुल ५ हजार ८ सय ४९ रन बटुलेका छन् । उनले पार्ट टाईम स्पिन बलिङ पनि राम्रो गर्ने गर्दछन् । मध्यक्रमका भरपर्दा ब्याट्सम्यान रुट जसले आफ्नो उत्कृष्ट प्रर्दशनमा इंग्ल्यान्डलाई पहिलो उपाधि दिलाउन सक्छन् ।

१. जोफ्रा आर्चर (बलर)

तीव्र गतिका बलर जोफ्रा आर्चर आफ्नो बाउन्सर बलमै पनि ब्याट्सम्यानलाई दबाबमा राख्ने गर्दछन् । अष्ट्रेलियासँगको सेमिफाइनल खेलमा आर्चरको बाउन्सर बलले लागेका विकेटकीपर एलेक्स केरि घाइते हुन पुगेका थिए । फ्रेन्चाइज लिगमा उत्कृष्ट प्रर्दशन गर्दै दुई महिना अघिमात्रै इंग्ल्यान्डको टोलीमा डेब्यू गरेका आर्चर यस विश्वकपमा सर्वाधिक विकेट लिने खेलाडीको सुचिमा तेस्रो स्थानमा छन् । इंग्ल्यान्डलाई २७ वर्षपछि फाइनल सम्म पुर्याउन आर्चरको प्रर्दशन महत्वपूर्ण छ ।

अष्ट्रेलियासँगको सेमिफाइनल खेलमा आर्चरले कप्तान आरोन फिन्च र ग्लेन म्याक्सवेलको महत्वपूर्ण विकेट लिनुको साथै कसिलो बलिङ गरेका थिए । आर्चरले यस विश्वकपमा १० खेलमा १९ विकेट हात पारेका छन् । इंग्ल्यान्डको तर्फबाट एकै विश्वकपमा १९ विकेट लिने आर्चर पहिलो बलर समेत हुन् । आर्चर तीव्र गतिसँगै बल बाउन्स र योर्करको लागि सिपालु छन् । आर्चर तल्लोक्रममा ठूलो सट प्रहार गर्ने पनि त्यतिकै माहिर छन् । आर्चरले आफ्नो उत्कृष्ट प्रर्दशनमा इंग्ल्यान्डलाई पहिलो पटक उपाधि दिलाउन नायक बन्न सक्छन् ।