जर्जटाउन (एजेन्सी)– तीब्र गतिका बलर कागिसो राबाडाले उत्कृष्ट बलिङ गरेपछि त्रिकोणात्मक श्रृखंलामा आज दक्षिण अफ्रिकाले विश्वकप विजेता अस्ट्रेलियालाई ४७ रनले हराएको छ । टस जितेर ब्याटिङ गरेको दक्षिण अफ्रिकाले ५० ओभरमा ९ विकेट गुमाएर १ सय ८९ रन मात्र बनाउन सकेको थियो । मध्यम लक्ष्य पछ्याएको अस्ट्रेलिया ३४.२ ओभरमा १ सय ४२ रनमा अलआउट भयो ।

विकेट लिएपछि दक्षिण अफ्रिकी बलर कागिसो राबडा ।

ओपनर डेभिड वार्नरलाई दोस्रो ओभरमै आउट गरेपछि खेलमा विस्तारै दक्षिण अफ्रिका हावी हुँदै गएको थियो । अर्का ओपनर आरोन फिन्चले सर्वाधिक ७२ र तल्लो क्रमका नाथन लियोनले ३० रन बनाउनु बाहेक अस्ट्रेलियाका कुनै पन ब्याट्सम्यानले दोहोरो आकडामा रन बनाउन सकेनन् ।
तीन स्पिनरका साथ उत्रेको दक्षिण अफ्रिकाका लागि २१ बर्षे रावडाले उच्च प्रदर्शन गरे । ७ ओभर बलिङ गर्दै मात्र १३ रन दिएर उनले ३ महत्वपूर्ण विकेट लिए । त्यस्तै वाइने पर्नेलले, इमरान ताहिर, आरोन फान्गिसोले समान २ र डेब्यू गरेका ताब्राइज साम्सीले १ विकेट लिएका थिए ।
त्यसअघि मध्यक्रमका ब्याट्सम्यान फरहान बिहाडिनले ८२ बलमा ६२ रन बनाएपछि दक्षिण अफ्रिकाले मध्यस्कोर तयार पारेको थियो । कप्तान एबि डि भिलियर्स, हासिम अमलाले पनि टालीलाई उकास्ने प्रयास गरे । ओपनर अमलाले ३५ र डी भिलियर्सले २२ रन बनाए ।
अस्ट्रेलियाका जोस हाजलेउड, नाथन काउल्टर निल,ग्लेन म्याक्सवेलले समान २ तथा लियोन र एडम जाम्पाले १÷१ विकेट लिए ।
तीन टोलीको सहभागिता रहेको श्रृखंलामा सबै टोलीले १ जित र १ हार बेहोरेका छन् । प्रतियोगितामा आयोजक वेस्ट इन्डिजको पनि सहभागिता छ ।