काठमाडौं (हाम्रो खेलकुद) – नेपाली क्रिकेट अम्पायर र स्कोररले अब मलेसियाको घरेलु क्रिकेटमा पनि खेलाउन पाउने भएका छन् । नेपाल क्रिकट अम्पायर एन्ड स्कोरर संघ (सियुएसएएन) र मलेसिया क्रिकेट बोर्ड (एमसिए) बीच सम्झौता पछि दुवै देशका अम्पायर र स्कोररले एक अर्काको घरेलु क्रिकेटमा भूमिका निर्वाह गर्न पाउने भएका छन् ।

मलृसियाको क्वालालम्पुरमा जारी अन्तर्राष्ट्रिय क्रिकेट परिषद् (आइसिसी) पुरुष क्रिकेट विश्व कप च्यालेन्ज लिग एका दौरान दुई पक्षबीच मंगलबार सम्झौता भएको थियो । सियुएसएएनकातर्फबाट अध्यक्ष बुद्धिबहादुर प्रधान र एमसिएका अध्यक्ष महिन्दा भभिल्लपुरमले सम्झौता पत्रमा हस्ताक्षर गरेका थिए ।

सियुएसएएनका तर्फबाट केन्द्रिय सदस्य दुर्गानाथ सुवेदी र एमसिएका प्रमुख कार्यकारी अधिकृत दीनेश मुत्थुरमनले साक्षीका रुपमा हस्ताक्षर गरेका थिए । एमसिएका अध्यक्ष भल्लिपुरमले मलेसिया क्रिकेट सधै नेपाल क्रिकेट संघ नजिक रहेको उल्लेख गर्दै दुई देशबीच क्रिकेट सम्बन्धलाई थप विस्तार गर्न यो महत्वपूर्ण कदम हुने विश्वास व्यक्त गरे ।

सियुएसएनका अध्यक्ष प्धानले दुई पक्षबीच अम्पायर र स्कोररका लागि पहिलो पटक औपचारिक सम्झौता भएकाले यसले उदाहरण प्रस्तुत गर्नुका साथै प्राविधिक जनशक्तिलाई थप स्तरीय बन्ने अवसर दिने विश्वास व्यक्त गरे ।