काठमाडौं (हाम्रो खेलकुद) – १३ औं दक्षिण एसियाली खेलकुद (साग) अघि अन्तिम तथा तेस्रो अभ्यास खेलमा नेपाल ए ले माल्दिभ्सलाई ८ विकेटले पराजित गरेको छ ।

जितका लागि १ सय १३ रनको सामान्य लक्ष्य पछ्याएको नेपाल ए ले १३.५ ओभरमा २ विकेट गुमाउँदै पुरा गर्यो । ओपनर सुनिल धमला ३२ बलमा ३ चौका र २ छक्का सहित ४१ रनमा अविजित रहे । सुवास खकुरेल ३१ बलमा ३ चौका र १ छक्का सहित ३६ रनमा नट आउट रहे । ओपनर रित गौतम १८ बलमा ३ चौका सहित २४ रनमा बोल्ड हुँदा विशाल विक्रम केसीले खाता खोल्न सकेनन् । माल्दिभ्सका हसन इबरहिमले २ विकेट लिए ।

त्यसअघि माथिल्लो मुलपानी क्रिकेट मैदानमा टस जितेर ब्याटिङ थालेको माल्दिभ्सले निर्धारित २० ओभरमा ९ विकेट गुमाउँदै १ सय १२ रन बनाएको थियो । उसमा अहमद हसनले ३९ बलमा २ चौका सहित सर्वाधिक १९ रनको योगदान दिए । ओपनर एडम उमर शून्य र मोहम्मद इमान अलीले १० रन जोडे । मोहम्मद रिजवान १२ रनमा आउट हुँदा हसन इबराम १७ रनमा नट आउट रहे ।

नेपालका लागि युवा लेग स्पिनर तिलकराज भण्डारीले ४ ओभरमा १ मेडन सहित ११ रन खर्चेर ३ विकेट लिए । बिक्रम शोवले ४ ओभरमा २७ रन खर्चेर २ विकेट लिए । आकश चन्द, रावल प्रताप सिंह र शेर मल्लले १-१ विकेट लिए ।

पहिलो अभ्यास खेलमा नेपाल ए ४९ रन र दोस्रो खेलमा १ सय ७ रनको फराकिलो अन्तरले विजयी भएको थियो । सागको अन्तिम १५ मा नपरेका टोलीलाई समेटेर नेपाल ए टोली बनाइएको थियो । सुरुवाती दुई खेलको कप्तानी शरद भेषावकरले गर्दा आजको खेलमा प्रदीप ऐरीले गरेका थिए ।