भूपेन्द्र जिसी, काठमाडौं

लगातार असफलताले निराशा बढाउँछ । जुनसुकै खेल होस्, लगातार पराजित हुँदा समर्थकमा एक किसिमको वितृष्णा पैदा हुन्छ  यसले खेलको लोकप्रियतामा नै असर गर्छ । विश्व क्रिकेट जगतमा एक उदारणीय क्रिकेट टोली नेपालको पछिल्लो समयको प्रर्दशन निराशजनक छ । अर्थात पछिल्लो समय नतिजाको हिसाबले नेपाली क्रिकेट केहि कमजोर बन्दै आएको छ । उपाधि जित्न सकेको छैन । धेरै प्रतियोगितामा अधिल्लो चरण प्रवेशको लागि अन्य टोलीको नतिजा र रन रेटको समिकरणमा भरपर्दै आएको छ ।

सन् २०१४ मा बंगलादेशमा पहिलो पटक टि ट्वान्टी विश्वकप खेल्दा लोकप्रियता ह्वात्तै बढेको थियो । जुन लोकप्रियता पुर्व कप्तान पारस खड्काले कल्पनासम्म नगरेको बेला बेलामा बताउने गर्दछन् । सन् २०१४ को टि ट्वान्टी विश्वकपपछि गत वर्ष पाएको एक दिवसिय मान्यतानै नेपाली पुरुष टोलीले हात पारेको ठूलो सफलता हो । गत माघमा यूएईसँगको तीन टि ट्वान्टी र वान डे सिरिज २–१ ले जित्नु सफलता हुन् ।

गत जुलाईमा सिंगापुरमा सम्पन्न आईसीसी टि२० एसिया विश्वकप छनोटमा खराब प्रर्दशन गर्दै बाहिरिएसँगै समर्थक र शुभचिन्तक निराश बनेका छन् । १३ औं दक्षिण एसियाली खेलकुद (साग) को प्रर्दशनले उक्त निराशामा मलाम लगाउन सक्छ । घरेलु मैदानबाटै नेपाली टोलीले समर्थकमा खुसी  फर्काउने आशा गरिएको छ ।

सागमा नेपालसहित दुई टेष्ट राष्ट्र बंगलादेश र श्रीलंकाको यू२३ टोली, माल्दिभ्स र भुटान छन् । टि ट्वान्टी शैलीमा हुने खेलमा राउन्डरोविनको आधारमा लिग सकिएपछि शीर्ष दुई टोली स्वर्ण पदकको लागि भिड्ने छन् । घरेलु मैदानमा हुने साग पुरुष क्रिकेट टोलीले स्वर्ण जित्न सके विश्वकप छनोटबाट बाहिरिदाको पिडामा केहि हदसम्म समर्थकले बिर्सनेछन् । कमजोर प्रर्दशन गरे निराशा झन बढ्ने छ । सागमा घरेलु मैदानमा खराब प्रर्दशन गरे लोकप्रियता घट्दै जाने छ ।

गत जुलाईमा टि ट्वान्टी एसिया छनोटमा नेपालले उपाधि जित्ने पक्का जस्तै थियो । वरियता देखी हरेक कुरामा नेपाल अब्बल थियो । तर नेपाल कतार र सिंगापुरसँग पराजित हुँदै बाहिरियो । आफुभन्दा धेरै कमजोर टोलीसँग पराजित भएपछि समर्थकमा निराशा बढेको पाइन्छ । यसै हप्ता सम्पन्न एसीसी इमर्जिङ कपमा पनि नेपालको प्रर्दशन खराब रह्यो ।

भारत र बंगलादेशको यू२३ टोलीले नेपाललाई सहजै पराजित गरेको थियो । एक समर्थकले गत सेप्टेम्बरमा सिंगापुरले आयोजना गरेको त्रिकोणात्मक टि ट्वान्टी सिरिजमा सिंगापुरलाई ९ विकेटले हराएपछि सामाजिक सञ्जालमा लेखेका थिए, ‘जित्ने बेला जितेन अब जितेर के काम ?’

यसले निराशालाई प्रष्टाउछ । त्यसैले नेपाली क्रिकेट टोलीले सागमा स्वर्ण जित्न सके समर्थकमा खुसि फर्किने आशा गर्न सकिन्छ ।

सागमा कस्तो छ नेपाली टोली ?

घरेलु मैदानमा हुने सागको लागि घोषणा टोलीमा इमर्जिङ कपमा नरहेका पुर्व कप्तान पारस खड्का छन् । जसले नेपाली टोलीको प्रर्दशन र मनोबल दुबै बढ्ने छ । ओपनरको रुपमा पारस खड्का र कुशल भुर्तेल रहने छन् । पछिल्लो समय टि ट्वान्टीमा ब्याटिङक्रम अनिश्चित छ । त्यसैले ब्याट्सम्यानको ब्याटिङक्रम निश्चित छैन । दीपेन्द्र सिंह ऐरी, आरिफ शेख, ज्ञानेन्द्र मल्ल, सन्दीप जोरा र विनोद भण्डारी ब्याट्सम्यानको रुपमा छन् ।

सोमपाल कामी, करण केसी र पवन सरार्फ अलराउन्डरको भूमिकामा मैदान उत्रने छन् । योर्कर लागि परिचत अभिनास बोहोरा डेथ ओभरमा हतियार हुन् । युवा खेलाडी तथा तीब्र गतिका बलर रशिद खान डेब्यूको पर्खाइमा हुने छन् । स्पिनरमा  ललित नारायण राजवंशी र सुशन भारी छन् । युवा खेलाडीको बाहुल्यता रहेको नेपाली पुरुष टोली सन्तुलित र बलियो देखिन्छ । आफ्नो प्रतिद्वन्द्वी अनुसार प्रर्दशन गर्ने नेपालले सागमा कस्तो प्रर्दशन गर्छ भन्ने अर्को चिन्ता पनि छ ।

युवालाई अवसर

सागको लागि नेपाली घोषणा टोली हेर्ने हो भने पारस, ज्ञानेन्द्र र विनोदलाई छाड्दा अन्य सबै युवा खेलाडी हुन् । पहिलो पटक टोलीमा स्थान बनाएका तीब्र गतिका बलर राशिद खान, इमर्जिङ कपमा भारतविरुद्ध डेब्यू गरेका कुशल भुर्तेल, पवन सरार्फ, स्पिनर सुसन भारी र ललित नारायण राजवंशीले यस अवसरलाई चुक्न दिनुहुँदैन ।

घरेलु मैदान र समर्थकको साथ

समर्थकले उमेर, महिला, पुरुष र घरेलु प्रतियोगिता सबैमा नेपाली क्रिकेटलाई राम्रो साथ दिदै आएका छन् । सागमा पनि राम्रो साथ मिल्ने आशा गरिएको छ । घरेलु समर्थकलाई १२ औं खेलाडी भन्ने गरिन्छ । १२ औं खेलाडीको फाइदा नेपाललाई पुग्ने छ । टियु क्रिकेट मैदानकै प्रशिक्षणबाट खेलाडी तयार भएका छन् । जसको कारण नेपालले घरेलु मैदानको राम्रो उपयोग गर्ने अनुमान गरिएको छ ।

टेष्ट टोलीको चुनौती

साग पुरुष क्रिकेट टोलीमा ५ टोलीको सहभागिता छ । तुलानात्मक रुपमा भुटान र माल्दिभ्स नेपाल भन्दा कमजोर टोली हुन् । यी दुई देशमाथि नेपालको जित निश्चित जस्तै छ । कसरी जित्छ त्यो हेर्न बाँकी छ । नेपालको लागि चुनौती दुई टेष्ट टोलीको यू२३ टिमसँग हुने छ । श्रीलंकाले कामिन्दु मेन्डिसलाई समेट्दै टोली घोषणा गरेको छ । यू१९ र प्रथम श्रेणी खेलेका खेलाडीको बाहुल्यता श्रीलंका टोलीमा देखिन्छ । बंगलादेशले टोली घोषणा गर्न बाँकी छ । इमर्जिङ टिम्स एसिया कपमा सिनियर खेलाडीलाई प्रथामिकतामा राखेको बंगलादेशले सागमा पनि बलियो टोली पठाउने अनुमान गरिएको छ ।