पोखरा (हाम्रो खेलकुद) – भारतीय अलराउन्डर सुवोध भाटीले उत्कृष्ट ब्याटिङ गरेपछि पोखरा प्रिमियर लिग टि ट्वान्टी क्रिकेटमा काठमाडौं गोल्डेन्सले पोखरा पल्टनलाई १ सय १६ रनको लक्ष्य दिएको छ ।

पोखरा क्रिकेट मैदानमा टस हारेर ब्याटिङ थालको काठमाडौंले निर्धारित २० ओभरमा ८ विकेट गुमाउँदै १ सय १५ रन बनायो । काठमाडौंका लागि सुवोधले सर्वाधिक ४५ रनको योगदान दिए । सुवोध सर्वजीत लड्डाको १७ ओभरको तेस्रो बलमा छक्का हान्ने धुनमा ठूलो सट खेल्दा काउकर्नरमा आशिफ शेखबाट क्याच आउट हुनु पुगे । सुबोधले २९ बलमा समान ४ चौका र छक्का प्रहार गरे ।

काठमाडौंका सबै ब्याट्सम्यानलाई दोहोरो अंकमा रन जोड्नै सघर्ष पर्दा सुवोधले खुलेर खेलेका थिए । दशौं ओभरको दोस्रो बलमा पवन सरार्फ आउट भएपछि ४५–५ को कमजोर अवस्थामा रहेको काठमाडौंलाई सुवोधले आफ्नो एकल प्रर्दशनमा सम्मानजनक योगफलमा पुर्याएका थिए ।

तेस्रो ओभरको चौथो बलमा प्रथामेश डांकेले विकेटकीपर विनोद भण्डारीबाट कट बिहाइन्ड निकाल्दै ओपनर जयकिशन कोल्सावालालाई ९ रनमा क्याच आउट गराए । जयकिशनले ६ बलमा २ चौका प्रहार गरे । पहिलो विकेटका लागि सुवास खकुरेल र जयकिशनले १८ रनको साझेदारी गरेका थिए ।

स्पिनर ललित नारायण राजवंशीले चौथो ओभरको दोस्रो बलमा सुवासलाई सट थड म्यानमा सर्वजीत लड्डाबाट ६ रनमा क्याच आउट गराए । उनले १२ बलमा १ चौका प्रहार गरे । लामो समयपछि घरेलु क्रिकेटमा फर्किएका सुवासले ठूलो इनिङ खेल्न सकेनन् ।

राशिद खानले पाँचौ ओभरको दोस्रो बलमा कप्तान ज्ञानेन्द्र मल्ललाई १ रनमा बोल्ड आउट गरे । छैटौं ओभरको दोस्रो र तेस्रो बलमा ललितलाई लगातार छक्का प्रहार गरेका गौरव तोमर चौथो बलमा त्यस्तै ठूलो सट खेल्ने धुनमा लङ अफमा कुशल भुर्तेलबाट क्याच आउट पुगे । गौरवले ७ बलमा २ छक्का सहित १३ रन जोडे ।

दशौं ओभरको दोस्रो बलमा बायाँ हाते स्पिनर कुशल मल्लले पवन सरार्फलाई मिड विकेटमा आशिफ शेखबाट ६ रनमा क्याच आउट गराए । पवनले १८ बलमा १ चौका मात्र प्रहार गरे । कुशललेनै १२ औं ओभरको तेस्रो बलमा कट एण्ड बोल्ड गर्दै पृथु बास्कोटालाई ७ रनमा पेभिलिएन फर्काए । १९ ओभरको अन्तिम बलमा राशिदले वसन्त रेग्मीलाई ८ रनमा बोल्ड आउट गरे । सुसन भारी १० र अमृत भट्टटाई १ रनमा नट आउट रहे ।

स्पिनर ललित नारायण राजवंशीले ४ ओभरमा १ मेडन सहित २१ रन खर्चेर २ विकेट लिए । युवा तीब्र गतिका बलर राशिद खानले ४ ओभरमा १७ रन खर्चेर २ विकेट लिए । पीपीएलमा डेब्यू खेल खेलेका युवा बायाँ हाते स्पिनर कुशल मल्लले ३ ओभरमा १२ रन खर्चेर २ विकेट लिए । सर्वजीत लड्डा र प्रथामेश डाकेले समान १–१ विकेट लिए ।