एजेन्सी – वेस्ट इन्डिजसँगको पहिलो टि ट्वान्टी खेलमा पाहुना टोली आयरल्यान्डले रोमान्चक जित हात पारेको छ । बिहीबार बिहान सम्पन्न पहिलो खेलमा आयरल्यान्डले वेस्ट इन्डिजलाई ४ रनले हराएको हो ।

२ सय ९ रनको विशाल लक्ष्य पछ्याएको वेस्ट इन्डिजले निर्धारित २० ओभरमा ७ विकेट गुमाउँदै २ सय ४ रन बनायो । अन्तिम दुई ओभरमा १६ रन बनाउन नसक्दा वेस्ट इन्डिजले झिनो हार बेहोर्नु परेको हो ।

१९ औं ओभरमा क्रेग योङ ३ रन मात्रै खर्चेपछि वेस्ट इन्डिजलाई जितको लागि अन्तिम ओभरमा १३ रन आवश्यक रहेको थियो । जोशुआले अन्तिम ओभरमा ८ रन खर्चेर २ विकेट लिदै जित पक्का गरे । पहिलो बलमा शेरफेन रदरफोर्डलाई क्याच आउट गराए ।

दोस्रो बलमा ब्राभोले छक्का प्रहार गरेपछि खेल अझ रोमान्चक बनेको थियो । तर तेस्रो बलमा दुई र चौथो बलमा डट खाए । ब्राभो पाँचौ बलमा ९ रनमा क्याच आउट भएपछि वेस्ट इन्डिजको जित टाढिएको थियो ।

ओपनर इभिन लुइसले २९ बलमा ६ चौका र ३ छक्का सहित सर्वाधिक ५३ रनको योगदान दिए । लेन्डन सिमन्सन २२, शिम्रोन हिटमायर २८, कप्तान काइरान पोलार्ड ३१, विकेटकिपर निकोलस पूरन र शेरफेन रदरफोर्डले २६-२६ रनको योगदान दिए ।

आयरल्यान्डका जोशुआ लिटिलले ४ ओभरमा २९ रन खर्चेर ३ विकेट लिए । क्रेग योङ २, जर्ज डोकरेल र सिमी सिंहले १-१ विकेट लिए ।

त्यसअघि नेशनल क्रिकेट स्टेडियम ग्रेनाडामा टस जितेर पहिला ब्याटिङ गर्ने निर्णय लिएको आयरल्यान्डले निर्धारित २० ओभरमा ७ विकेट गुमाउँदै २ सय ८ रन बनाएको थियो । ओपनर पल स्टर्लिङ र केभीन ओ ब्रायनले १२.३ ओभरमा १ सय ५४ रनको शतकीय साझेदारी गर्दै विशाल योगफलतर्फ अघि बढाएका थिए ।

सन्न्यास फिर्ता लिदै टोलीमा पुनरागमन गरेका ब्राभोले केभीन ओ ब्रायनलाई ४८ रनमा बोल्ड आउट गर्दै साझेदारी तोडे । उनले ३२ बलमा ४ चौका र २ छक्का प्रहार गरे । केभीन ओ ब्रायनले गत वर्षको इपिएल काठमाडौं किंग्स ११ बाट खेलेका थिए । यो पटक पनि काठमाडौंबाटै खेल्ने पक्का भएको छ ।

पल स्टर्लिङले ४७ बलमा ६ चौका र ८ छक्का सहित ९५ रन जोड्दै म्यान अफ द म्याच चुनिए । हेडन वाल्शले १४ औं ओभरको दोस्रो बलमा लुइसबाट क्याच गराएपछि स्टर्लिङ शतक बनाउन ५ रनले चुकेका थिए ।

स्टर्लिङले इपिएल गत वर्ष चितवन टाइगर्सबाट खेलेका थिए । ग्रेरेथ डेनली १९, कप्तान एन्ड्रयू बलबर्नी ७ र विकेटकिपर गैरी विल्सनले १७ रनको योगदान दिए ।

वेस्ट इन्डिजका शेल्डन कट्र्टेल, खारी पियरे र ड्वेन ब्राभोले २-२ विकेट लिए । तीन टि ट्वान्टी सिरिजमा आयरल्यान्डले १-० को अग्रता लिएको छ । दोस्रो खेल शनिवार र तेस्रो आइतबार हुने छ ।