एजेन्सी – न्युजिल्यान्डसँगको पाँच टि ट्वान्टी सिरिज अन्तर्गत दोस्रो खेलमा भारत ७ विकेटले विजयी भएको छ । योसँगै पाँच टि ट्वान्टी सिरिजमा भारतले २-० को अग्रता कायम गरेको छ ।

जितका लागि १ सय ३३ रनको लक्ष्य पछ्याएको भारतले १७.३ ओभरमा ३ विकेट गुमाउँदै पुरा गर्यो । भारतको जितमा ओपनर तथा विकेटकिपर लोकेश राहुलले ५० बलमा ३ चौका र २ छक्का सहित ५७ रनमा अविजित रहँदै जित पक्का गरे । त्यस्तै श्रेयस ऐरले ३३ बलमा १ चौका र ३ छक्का सहित ४४ रनमा क्याच आउट भए । शिवम दुबे ८ रनमा अविजित रहे ।

पहिलो ओभरको अन्तिम बलमै टिम साउथीले रस टेलरबाट ओपनर रोहित शर्मालाई ८ रनमा क्याच आउट गराएका थिए । साउथीलेनै कप्तान विराट कोहलीलाई छैटौं ओभरको दोस्रो बलमा ११ रनमा क्याच आउट गराउँदै झिनो जितको आशा देखाएका थिए । तर तेस्रो विकेटका लागि राहुल र ऐरले ८६ रनको साझेदारी गर्दै जित पक्का गरे । न्युजिल्यान्डका टिम साउथी २ र ईश सोधीले १ विकेट लिए ।

त्यसअघि इडेन पार्कमा टस जितेर ब्याटिङ गर्ने निर्णय लिएको घरेलु टोली न्युजिल्यान्डले निर्धारित २० ओभरमा ५ विकेट गुमाउँदै १ सय ३२ रन मात्रै बनाउन सकेको थियो । न्युजिल्यान्डलाई ओपनर मार्टिन गुप्टिल र कोलिन मुनरोले ६ ओभरमा ४८ रनको साझेदारी गर्दै राम्रो सुरुवात दिलाएका थिए । तर मध्यगति र तल्लोक्रममा रन जोड्न नसक्दा सस्तैमा समेटिएको हो ।

छैटौं ओभरको अन्तिम बलमा शार्दुल ठाकुरले विराट कोहलीबाट क्याच गराउनु अघि गुप्टिलले २० बलमा ४ चौका र २ छक्का सहित ३३ रन जोडे । कोलिन मुनरोलाई शिवम दुबेले कोहलीबाटनै २६ रनमा क्याच आउट गराए । स्पिनर रविन्द्र जडेजाले कप्तान केन विलियम्सनलाई १३ र कोलिन डी ग्रान्डहोमलाई ३ रनमा क्याच आउट भएपछि न्युजिल्यान्ड दबाबमा परेको थियो ।

विकेटकिपर टिम सेफर्ट २६ बलमा १ चौका र २ छक्का सहित ३३ रनमा अविजित रहे । रस टेलरले २४ बलमा १८ रन जोडे । भारतका स्पिनर रविन्द्र जडेजाले ४ ओभरमा १८ रन खर्चेर २ विकेट लिए । शार्दुल ठाकुर, शिवम दुबे र जस्प्रित बुमराहको नाममा १-१ विकेट रह्यो । पहिलो खेलमा भारत ६ विकेटले विजयी भएको थियो । तेस्रो खेल बुधबार हुने छ ।