एजेन्सी – अन्तर्राष्ट्रिय क्रिकेट परिषद (आईसीसी) ले भारतीय क्रिकेट टोलीलाई लगातार दोस्रो खेलमा गल्ति गरेपछि पुन: कारवाही गरेको छ ।

आईतबार सम्पन्न पाँचौ तथा अन्तिम खेलमा ‘स्लो ओभर रेट’ को कारण भारतलाई २० प्रतिशत रकम जरिवना लगाएको आईसीसीले सोमबार एक प्रेस विज्ञप्ती जारी गर्दै जनाएको छ । त्यसअघि भारतलाई शुक्रबार न्युजिल्यान्डसँगको चौथो टि ट्वान्टी खेलमा ‘स्लो ओभर रेट’ को कारण आईसीसीले ४० प्रतिशत रकम जरिवना लगाएको थियो ।

पाँचौ टि ट्वान्टी खेलमा भारतले निर्धारित समय भन्दा एक ओभर ढिला गर्दा २० प्रतिशत जरिवानामा परेको हो । पाँचौ खेलमा कप्तानी गरेका रोहित शर्माले गल्ती स्विकार गरेका छन् । उनी ब्याटिङ गर्ने क्रममा घाइते भएपछि केएल राहुलले पनि कप्तानी सम्हालेका थिए । आईसीसीको आचार सहिता २.२२ अनुसार एक ओभर ढिला भए २० प्रतिशत जरिवना लाग्ने गर्दछ । भारतले पाँच टि ट्वान्टी सिरिज क्लिन स्वीप गरेको थियो ।

भारत पहिलो खेलमा ६ विकेट र दोस्रो खेलमा ७ विकेटले विजयी भएको थियो । तेस्रो र चौथो खेलमा भारत सुपर ओभरमा विजयी भएको थियो । पाँचौ खेलमा भारत ७ रनले विजयी हुन पुगेको थियो । कमजोर फिनिसरको कारण न्युजिल्यान्डले अन्तिम तीन खेल जित नजिक पुगेर गुमाउनु परेको थियो ।

भारत र न्युजिल्यान्डबीच थप तीन खेलको ओडीआई सिरिज पनि हुने छ । पहिलो ओडीआई माघ २२, दोस्रो २५ र अन्तिम २८ मा हुने छ । न्युजिल्यान्ड र भारतबीच थप दुई टेष्ट पनि हुने छ ।