एजेन्सी – अष्ट्रेलिया र इंग्ल्यान्डबीचको तीन टि२० सिरिज अन्तर्गत तेस्रो तथा अन्तिम खेल आज हुँदैछ । खेल नेपाली समय अनुसार राती १०ः ४५ बजेपछि साउथह्याप्टनमा सुरु हुनेछ ।

इंग्ल्यान्डले पहिलो खेलमा दुई रन र दोस्रोमा ६ विकेटले विजयी हुँदै एक खेल अगावै सिरिज २-० ले जितेको छ । घरेलु टोली इंग्ल्यान्ड सिरिज क्लिनस्वीप गर्ने सोचमा छ । यता अष्ट्रेलिया आफ्नो साख बचाउन अन्तिम खेलमा जित निकाल्नै पर्ने दबाब छ । आजको खेलको विजेता विश्व टि२० वरीयतामा शीर्ष स्थानमा रहने छ ।

अष्ट्रेलिया र इंग्ल्यान्डको समान २१ खेलमा समान २ सय ७३ रेटिङ अंक छ । यसअघि टि२० वरीयतामा अष्ट्रेलिया शीर्षस्थानमा थियो । तर यस सिरिजमा सुरुवाती दुई खेलमा जित निकाल्दै इंग्ल्यान्ड शीर्षस्थानमा रहेको छ । दुवै टोलीको मध्यक्रम ब्याटिङ केहि कमजोर देखिएको छ ।

पहिलो खेलमा १ र दोस्रो खेलमा २ रनमा आउट भएका विकेटकिपर एलेक्स केरीको स्थानमा अष्ट्रेलियाले युवा जोश फिलिपेलाई मौका दिन सक्छ । आज अष्ट्रेलिया एक स्पिनरको साथ मैदान उत्रदै अर्का ब्याट्सम्यान मार्नस लाबुसेनलाई पनि टि२० खेलमा डेब्यु गराउन सक्छ । एश्टन अगरलाई निरन्तरता दिन सक्छ । पहिलो खेलमा ४७ रन र दोस्रो ४२ रन खर्चेका स्पिनर एडम जम्पालाई आज बेन्चमा राख्न सक्छ ।

इंग्ल्यान्डका ओपनर जस बटलर पारिवारिक कारण टोलीमा छैनन् । बटलरले दोस्रो खेलमा अविजित ७७ रन जोड्दै इंग्ल्यान्डलाई सहज जित दिलाएका थिए । पहिलो खेलमा उत्कृष्ट सुरुवात दिलाउने क्रममा ४४ रन जोडेका थिए । बटलर नहुँदा इंग्ल्यान्डलाई केहि घाटा लाग्न सक्छ । बटलर नहुँदा ओपनिङ जोनी बेयरस्टो र टम ब्यान्टनले गर्ने छन् ।

सुरुवाती दुई खेलमा सस्तैमा आउट भएका बेयरस्टोलाई ठूलो इनिङ खेल्न आवश्यक छ । यसअघि ब्यान्टनले चौथो नम्बरमा ब्याटिङ गरेका थिए । चौथो नम्बरमा इंग्ल्यान्डले जो डेनलीलाई खेलाउने सम्भावना उच्च छ । यी दुई देशबीच कुल १८ टि२० आई खेल भएका छन् । जसमा इंग्ल्यान्ड ८ खेलमा विजयी हुँदा ९ खेलमा पराजित भएको छ । एक खेल नतिजाविहिन बनेको थियो ।