काठमाडौंं (हाम्रो खेलकुद) – नेपाल क्रिकेट संघ (क्यान) ले धुर्मुस सुन्तली फाउन्डेसनको पहलमा चितवन भरतपुरको शान्तिपुरमा निर्माण भइरहेको गौतम बुद्ध अन्तर्राष्ट्रिय रंगशालाको निरिक्षण गरेको छ ।

क्यानको केन्द्रिय कार्यसमिति बोर्ड बैठक आज चितवनमा बस्दै छ । त्यसअघि क्यानका पदाधिकारीले गौतम बुद्ध रंगशालाको निरिक्षण गरेका हुन् । क्यानका सचिव अशोकनाथ प्याकुरेल लगायतका पदाधिकारीहरुले धुर्मुस सुन्तली फाउन्डेसनका अध्यक्ष सिताराम कट्टेलसँगै रंगशालाको निरिक्षण गरेका थिए । धुर्मुसले रंगशाला निर्माणबारे क्यानलाई जानकारी दिएका थिए ।

चितवनमा बस्न लागेको बोर्ड बैठकले वार्षिक साधरण सभा कहिले गर्ने देखि खेलाडीको नयाँ ग्रेड, पारिश्रमिक, एडिट लगायतका विषयमा छलफल हुने क्यान निकट स्रोतले जानकारी दिएको छ । क्यानले आफ्नो पहिलो वार्षिक साधरण सभा भदौमा गर्ने भनेपनि कोरोना महामारीको कारण स्थगित गरेको थियो ।

क्यानले गत माघमा नै कोषाअध्यक्ष रोशनकुमार सिंहको संयोजकत्वमा केन्द्रिय सदस्य दुर्गाराज पाठक र अमितविर पाण्डेको समिति गठन गर्दै पुरुष २४ र महिला १८ खेलाडीलाई ए प्लस , ए, बी र सी ग्रेडमा रहने खेलाडी नाम र पारिश्रमिक टुङ्गो लगाउन भनेको थियो । उक्त समीतिले आजको बोर्ड बैठकले आफ्नो प्रस्ताव बुझाउने छन् । जुन प्रस्तावमा निर्णय हुन सके क्यानले सन् २०२० मा महिला र पुरुष खेलाडी दुवैको ग्रेड र पारिश्रमिक सार्वजनिक गर्ने छ ।

अन्तर्राष्ट्रिय क्रिकेट परिषद् (आइसिसी) बाट पूर्ण रुपमा क्यानको प्रतिबन्ध कसरी फुकुवा गर्ने भन्ने विषयमा पनि छलफल हुने छ । गत कात्तिकमा आइसिसीले क्यानलाई २०७३ मा लगाएको प्रतिबन्ध सशर्त रुपमा फुकुवा गरेको थियो । बोर्ड बैठकमा आज एडिट देखि लिएर अन्य विभिन्न विषयमा छलफल हुने छ ।