काठमाडौं (हाम्रो खेलकुद) – नेपाल क्रिकेट संघ (क्यान) ले सन् २०२० डिसेम्बरमा घरेलु मैदानमा अन्तर्राष्ट्रिय सिरिज गर्ने तयारी गरेको छ ।

क्यानले घरेलु मैदान टियूमा आगमी डिसेम्बरमा अन्तर्राष्ट्रिय मैत्रीपूर्ण सिरिज गर्न अन्तर्राष्ट्रिय क्रिकेट परिषद् (आइसिसी) सँग समन्वय गर्दै तयारी अगाडि बढाउने निर्णय गरेको छ । मंगलबार चितवनमा सम्पन्न क्यानको बोर्ड बैठकले महिला र पुरुष खेलाडीको पारिश्रमिक बढाउने, ग्रेड सार्वजनिक देखि डिसेम्बरमा अन्तर्राष्ट्रिय सिरिज गर्ने तयारी लगायतका विभिन्न निर्णय गरेको छ ।

क्यानले वार्षिक साधरण सभा असोज २८ मा गर्ने निर्णय गरेको छ । कोरोना महामारीको कारण भदौमा गर्ने तयारी गरेको साधरण सभा स्थगित भएको थियो । क्यानले १९ महिला खेलाडी र १८ जना पुरुष खेलाडीलाई केन्द्रिय खेलाडी सम्झौता सूचिमा राख्ने निर्णय गरेको छ । पुरुष खेलाडीको प्रति महिना ग्रेड ए मा रहेका खेलाडीले ५० हजार, बी ग्रेडमा रहेका खेलाडीले ४० हजार र सी ग्रेडका खेलाडीले ३० हजार दिने निर्णय गरेको छ । क्यानले १५ हजार प्रत्येक ग्रेडमा वृद्धि गरेको हो ।

सन् २०१९ मा भने आइसिसीसँग १० हजार थपेर पठाउन आग्रह गर्दै ग्रेड एमा रहेका खेलाडीलाई ४५, बी मा रहेकालाई ३५ र सी मा रहेका खेलाडीलाई २५ हजार प्रदान गरेको थियो । महिलातर्फ महिनाको ए ग्रेडका खेलाडीले १५ हजार, बी ग्रेडका खेलाडीले १२ हजार र सी ग्रेडका खेलाडीले १० हजार प्रदान गर्ने भएको छ । क्यानले पहिलो पटक महिलालाई पारिश्रमिक दिन थालेको हो ।

क्यानले आगमी मंसिरमा राष्ट्रिय खेलकुद परिषद् (राखेप) सँग समन्वय गर्दै महिला र पुरुष राष्ट्रिय प्रतियोगिता (पिएमकप) संचालन गर्ने निर्णय गरेको छ । राष्ट्रिय पुरुष खेलाडीको अभ्यास संचालन गर्ने तयारी गर्ने निर्णय गरेको छ । कर्णाली प्रदेशका संयोजकको पदमा पदम खडकालाई नियुक्त गरेको छ ।

अघिल्लो हप्ता झलारीमा मोटरसाइकल दुर्घटनामा परि ग्रान्डी अस्पतालमा उपचारत तीव्र गतिका बायाँ हाते बलर ललितसिंह भण्डारीको उपचारमा संघले परिवार, नेपाल प्रहरी क्लब, ट्रक ब्यवसायी लगायत सबैसँग समन्व गर्दै उपचारमा सहयोग गर्ने निर्णय गरेको छ ।