एजेन्सी – कप्तान रोहित शर्माको अर्ध शतक, काइरन पोलार्ड र हार्दिक पान्ड्याको आक्रामक ब्याटिङमा इन्डियन प्रिमियर लिग (आइपिएल) को १३ औं खेलमा मुम्बई इन्डियन्सले किंग्स इलेभेन पन्जाबलाई १ सय ९२ रनको विशाल लक्ष्य दिएको छ ।

शेख जायद आबूधाबीमा टस हारेर ब्याटिङको निम्तो पाएको मुम्बईले निर्धारित २० ओभरमा ४ विकेटको क्षतिमा १ रन ९१ बनायो । अन्तिम ओभरमा स्पिनर कृष्णाप्पा गौथमले चार छक्का सहित कुल २५ रन खर्चेका थिए । पोलार्डले अन्तिम तीन बलमा लगातार तीन छक्का प्रहार गरेका थिए ।

तल्लोक्रममा आक्रामक ब्याटिङ गरेका काइरन पोलार्ड २० बलमा ३ चौका र ४ छक्का ४७ रनमा अविजित रहे । हार्दिक पान्ड्या ११ बलमा ३ चौका र २ छक्का सहित ३० रनमा अविजित रहे । पाँचौ विकेटका लागि पान्ड्या र पोलार्डले मात्र ३.५ ओभरमा ६७ रनको अविजित साझेदारी गर्दै विशाल योगफलमा पुर्याए ।

मुम्बईका कप्तान रोहित शर्माले सर्वाधिक ७० रनको योगदान दिए । १७ औं ओभरको पहिलो बलमा ठूलो सट खेलेका रोहितलाई ग्लेन म्याक्सवेलको उत्कृष्ट फिल्डिङको सहयोगमा जेम्स निशमले क्याच लिएका थिए । रोहितले ठूलो सट खेलेपनि लङ अनमा रहेका म्याक्सवेलले बललाई समाउँदै निसमको हातबाट क्याच गराउँदै बाउन्ड्री बाहिर गरेका थिए । रोहितले ४५ बलमा ८ चौका र ३ छक्का प्रहार गरे ।

त्यसअघि शामीको दोस्रो ओभरको अन्तिम बलमा एम्पायरले रोहितलाई एलबिडब्लू आउट दिएका थिए । तर रोहितले रिभ्यु लिदै अम्पायरको निर्णयलाई गलत सावित गरेका थिए । योसँगै रोहितले आइपिएलमा ब्यक्तिगत पाँच हजार पनि रन पूरा गरेका छन् । विराट कोहली र सुरेश रैनापछि आइपिएलमा पाँच हजार रन पूरा गर्ने रोहित तेस्रो खेलाडी हुन् ।

ओपनर क्विन्टन डी ककलाई पहिलो ओभरको पाँचौ बलमा शेल्डन कटरेलले शून्यमा बोल्ड आउट गरेका थिए । चौथो ओभरको पाँचौ बलमा सूर्यकुमार यादव १० रनमा रन आउट भएका थिए । शामीले उत्कृष्ट डाइरेक्ट स्टम्प ताक्दै यादव पेभलिएन फर्किनु परेको थियो । तेस्रो विकेटका लागि इशान किशन र रोहित शर्माले ६२ रनको साझेदारी गर्दै इनिङ अगाडि बढाए ।

किशनलाई १४ औं ओभरको पहिलो बलमा कृष्णाप्पा गौथमले करुण नायरबाट २८ रनमा क्याच आउट गराए । किशनले ३२ बलमा १ चौका र १ छक्का प्रहार गरे ।

शेल्डन कटरेलले ४ ओभरमा एक मेडन सहित २० रन खर्चेर १ विकेट लिए । मोहम्मद शामीले ४ ओभरमा ३६ रन खर्चेर १ विकेट लिए । कृष्णाप्पा गौथमले ४ ओभरमा ४५ रन खर्चेर १ विकेट लिए ।