एजेन्सी– चेन्नई सुपर किंग्सका कप्तान तथा विकेटकिपर महेन्द्रसिंह धोनी इन्डियन प्रिमियर लिग (आइपिएल) सर्वाधिक खेल खेल्ने खेलाडी बनेका छन् ।

धोनीले चेन्नई सुपर किंग्सका ब्याट्सम्यान सुरेश रैनालाई पछि पर्दै शुक्रबार सनराइजर्स हैदराबादबिरुद्ध यस उपलब्धी हात पारेका हुन् । धोनीले आइपिएलमा कुल १ सय ९४ खेल खेलेका छन् । रैनाले १ सय ९३ खेल खेलेका छन् । रैना जारी सिजन पारिवारिक कारण नखेलेपछि धोनी सर्वाधिक खेल खेल्ने खेलाडी बनेका हुन् ।

धोनीले चेन्नईबाट ११ संस्करण कप्तानको रुपमा खेले । सन् २०१६ र २०१७ मा चेन्नई प्रतिबन्धमा परेपछि धोनीले राइजिङ पुणे सुपरजाइन्टबाट खेलेका थिए । धोनीले १ सय ६४ खेल चेन्नई र ३० खेले सुपरजाइन्टबाट खेलेका हुन् । सन् २००७ मा भारतलाई टि२० विश्वकप उपाधि जिताएका धोनी चेन्नईको पहिलो संस्करण देखिनै कप्तानी गर्दै गर्दै आएका छन् ।

धोनीले आफ्नो कप्तानीमा चेन्नईलाई तीन पटक उपाधि जिताएका छन् भने हालसम्म लिग चरणबाट बाहिरिनु परेको छैन । धोनीले १ सय ९४ खेलमा ४ हजार ५ सय २३ रन बनाएका छन् । जसमा उत्कृष्ट प्रर्दशन ८४ रनमा अविजित छ । आइपिएलमा धोनीले प्रया: ७ नम्बरमा बढी ब्याटिङ गर्दै उत्कृष्ट प्रर्दशन गर्दै आएका छन् ।

आइपिएल सर्वाधिक खेल खेल्ने दोस्रो खेलाडी रैनाले ५ हजार ३ सय ६८ रन बनाएका छन् । उत्कृष्ट प्रर्दशन एक सय रन अविजित छ । तेस्रो स्थानमा रहेका मुम्बई इन्डियन्सका कप्तान रोहित शर्माले कुल १ सय ९२ खेल खेलेका छन् । रोहितले चार पटक आइपिएल उपाधि जितेका छन् ।

रोहितले आइपिएलमा ५ हजार ६८ रन बनाई सकेका छन् । १ सय रनमा अविजित उनको उच्च प्रर्दशन हो । कोलकाता कप्तान दिनेश कार्तिक १ सय ८५ खेल खेलेका छन् । दिनेशले ३ हजार ६ सय ८५ रन बनाएका छन् । उच्च प्रर्दशन ९७ रनमा अविजित छ ।

विराट कोहली र रोविन उथप्पाले समान १ सय ८० खेल खेलेका छन् । हालसम्म उपाधि जित्न नसकेका कोहली आइपिएलमा सर्वाधिक रन बनाउने खेलाडी हुन् । कोहलीले ५ हजार ४ सय ३० रन बनाई सकेका छन् । पाँच शतक प्रहार गरेका कोहलीको उच्च प्रर्दशन १ सय १३ रन हो ।

उथप्पाले ४ हजार ४ सय २७ रन बनाएका छन् । उच्च प्रर्दशन ८७ रन छ । रविन्द्र जडेजा र युसुफ पठानले समान १ सय ७४ रन खेले खेलेका छन् । शिखर धवनले १ सय ६२ र पियुष चवलाले १ सय ६१ खेल खेलेका छन् ।