एजेन्सी – इन्डियन प्रिमियर लिग (आइपिएल) को १७ औं खेलमा आज मुम्बई इन्डियन्स र सनराइजर्स हैदराबादबीच प्रतिस्पर्धा हुँदैछ । खेल नेपाली समय अनुसार दिउँसो ३:४५ पछि शारजाहमा हुनेछ ।

दुवै टोली तेस्रो जितको सोचमा छन् । मुम्बई ४ खेलमा समान २ मा जित र हारका साथ दोस्रो स्थानमा छ । हैदराबाद ४ खेलमा समान २ मा जित र हार सहित चौथो स्थानमा छ । मुम्बईमा आक्रामक खेलाडीको बाहुल्यता हुँदा शारजाहमा रनको वर्षा बन्न सक्छ । शारजाहको बाउन्ड्री छोटो छ । आइपिएल जारी सिजनमा शारजाहमा तीन खेल भएका छन् । जसमा तीन खेलमा सबै टोलीले २ सय माथिको योगफल कटाएका छन् ।

राजस्थानले किंग्स इलेभेन पन्जाबले प्रस्तुत गरेको २ सय २४ रनको लक्ष्य शारजाहमा तीन बल अगाडि ६ विकेटको क्षतिमा पूरा गरेको थियो । त्यसअघि राजस्थानले चेन्नई सुपर किंग्सबिरुद्ध ७ विकेटको क्षतिमा २ सय १६ रन बनाएको थियो । चेन्नईले उक्त लक्ष्य पछ्याउने क्रममा ६ विकेटको क्षतिमा २ सय रन बनाएको थियो ।

शुक्रबार दिल्लीले शारजाहमै कोलकाताबिरुद्ध ४ विकेटको क्षतिमा २ सय २८ रन बनाएको थियो । कोलकाताले उक्त लक्ष्य पछ्याउनेक्रममा ८ विकेटको क्षतिमा २ सय १० रन बनाएको थियो । त्यसैले सुरुवाती तीन खेलको प्रर्दशन हेर्दा शारजाहमा २ सय भन्दा कम योगफल सुरक्षित देखिदैन ।

मुम्बईमा रोहित शर्मा, हार्दिक पान्ड्या, काइरन पोलार्ड, ईशान किशन, क्रुनाल पान्ड्या र क्विन्टन डी कक जस्ता ब्याट्सम्यान हुँदा विशाल योगफल बनाउन सक्छ । पोलार्ड र रोहित उत्कृष्ट लयमा छन् । पोलार्ड रोयल च्यालेन्जर्स बेंगलोरबिरुद्ध ६० र किंग्स इलेभेन पन्जाबबिरुद्ध ४७ रनको आक्रामक इनिङ खेलेका थिए । रोहितले कोलकाताबिरुद्ध ८० र पन्जाबबिरुद्ध ७० रन जोड्दै राम्रो लय देखिएका छन् ।

ठूला सटका लागि परिचित यी दुई ब्याट्सम्यानले शारजाहको छोटो बाउन्ड्रीको फाइदा उठाउँदै ठूलो इनिङ खेल्न सक्छन् । हार्दिक पान्ड्याले पन्जाबबिरुद्ध आक्रमक ३० रन जोडेका थिए । पान्ड्या पनि घातक बन्न सक्छन् । जस्प्रित बुमराह मुम्बईका प्रमुख बलिङ हतियार हुन् । टे«न्ट बोल्ट, स्पिनर राहुल चहर र जेम्श प्याटिनसनले पनि राम्रो प्रर्दशन गर्दै आएका छन् ।

यता हैदराबाद शीर्षक्रम ब्याटिङमा बढि निर्भर छ । कप्तान डेभिड वार्नर, जोनी बेयरस्टो, मनिष पान्डे र केन विलियम्सनलाई ठूलो इनिङ खेल्न आवश्यक छ । यता चेन्नई सुपर किंग्सबिरुद्ध दुई युवा खेलाडी प्रियम गर्गले ५१ र अभिषेक शर्माले ३१ रन जोड्दै जितको आधार बनाएका थिए । जसले गर्दा हैदराबादको मध्यक्रम समस्या समधान देखिएको छ । अर्का युवा ब्याट्सम्यान अब्दुल सामद पनि ठूला सटका लागि परिचित छन् ।

पछिल्ला दुई खेलमा राशिद खानले राम्रो प्रर्दशन गरेका छन् । मुम्बईलाई घातक बन्न सक्छन् । भुवनेश्वर कुमार चेन्नईबिरुद्ध १९ औं ओभरमा खुट्टाको एंकलमा समस्या देखिएको थियो । उनी फिट नभएको खण्डमा हैदराबाद समस्यामा पर्ने देखिन्छ । हैदराबादको दुबै जितमा उत्कृष्ट प्रर्दशन गरेको डेथ ओभर स्पेलिष्ट टि नटराजन मुम्बईलाई घातक बन्न सक्छन् । आइपिएलमा यी दुई टोलीबीच कुल १४ खेल भएको छ । जसमा मुम्बई ७ खेलमा विजयी हुँदा ७ खेलमा पराजित हुन पुगेको छ ।