एजेन्सी – इन्डियन प्रिमियर लिग (आइपिएल) को १८ औं खेलमा आज चेन्नई सुपर किंग्स र किंग्स इलेभेन पन्जाब खेल्दै छन् । खेल नेपाली समय अनुसार बेलुका ७ : ४५ पछि दुबईमा सुरु हुनेछ ।

पुछारमा रहेका यी दुई टोलीलाई आजको खेल जित्नै पर्ने दबाब छ । चेन्नई ४ खेलमा १ मा जित र ३ मा हार सहित पुछारमा छ । पन्जाब ४ खेलमा ३ मा हार र १ मा जित सहित सातौं स्थानमा छ । पन्जाबले तीन मध्य दुई खेलमा जित नजिक पुगेर हारेको थियो । पन्जाब पहिलो खेलमा दिल्लीसँग सुपर ओभरमा पराजित भएको थियो ।

दोस्रो खेलमा रोयल च्यालेन्जर्स बेंगलोरलाई ९७ रनको फराकिलो अन्तरले पराजित गरेको थियो । तेस्रो खेलमा राजस्थान रोयल्ससँग ४ विकेट र मुम्बईसँग ४८ रनले पराजित भएको थियो । राजस्थानबिरुद्ध २ सय २३ रन बनाएपनि उक्त योगफल बचाउन असफल भएको थियो ।

यता चेन्नईले लगातार खराब प्रर्दशन तीन हार बेहोरेको छ । चेन्नईको ब्याटिङ कमजोर देखिएको छ । पहिलो खेलमा मुम्बईलाई ५ विकेटले हराएपनि त्यसपछि लगातर हार बेहोरेको छ । जुन चेन्नईको इतिहासकै खराब सुरुवात मानिन्छ । चेन्नई राजस्थानसँग १६ रन, दिल्लीसँग ४४ रन र हैदराबादसँग ७ रनले पराजित भएको छ ।

ओेपनर शेन वानटसनको खराब लय चेन्नईलाई चिन्ताको विषय हो । आजको खेलमा वाटसनलाई बेन्चमा राखेर स्पिनर इमरान ताहिरलाई मौका दिन सक्छ । लगातार खराब प्रर्दशन गर्दै आएका केदार जाधवको स्थानमा नारायण जगदेसनलाई मौका दिन सक्छ । ओपनिङ ब्याट्सम्यान नारायण र फाफ डु प्लेसिसले ओपनिङ गर्न सक्ने सम्भावना छ ।

कप्तान महेन्द्र सिंह धोनीले हैदराबादबिरुद्ध राम्रो प्रर्दशन गरेका थिए । जुन चेन्नईलाई एक सकरात्मक पक्ष हो । यता साम करनलाई चौथो नम्बरमा ब्याटिङ गराउनु पर्ने आवश्यक देखिन्छ । तल्लोक्रममा रविन्द्र जडेजा र ड्वेन ब्राभोले ब्याटिङ सम्हाल्ने प्रयास गर्ने छन् । तीव्र गतिको बलरमा दीपक चहर र शार्दुृल ठाकुरलाई निरन्तरता दिने छ । यी दुईलाई साम करन र ब्राभोले साथ दिने छन् । स्पिनरमा इमरान ताहिर र पियुष चावला जोडीको सम्भावना छ । रविन्द्र जडेजा पार्टटाइम स्पिनर हुने छन् । धोनी, दिपक र करन प्रमुख हतियार हुन् ।

यता पन्जाबलाई डेथ ओभर बलिङ समस्या सुधार गर्न आवश्यक छ । जेम्श निसमको स्थानमा क्रिस जोर्डनको सम्भावना छ । ग्लेन म्याक्सवेलको कमजोर प्रर्दशन पन्जाबलाई अर्को चिन्ताको विषय हो । म्याक्सवेललाई ठूलो इनिङ खेल्न आवश्यक छ । ओपनर लोकेश राहुल र मयंक अग्रवालको उत्कृष्ट लय पन्जाबको बलियो हतियार हो ।

यी दुई ओपनरको प्रर्दशन पन्जाबलाई निकै महत्वपूर्ण हुने छ । मध्यक्रममा निकोलस पूरनले उत्कृष्ट ब्याटिङका साथ ठूलो इनिङ खेल्न सक्छन् । करुण नायर र शरफराज खानलाई पनि उत्कृष्ट प्रर्दशन गर्नु पर्ने आवश्यक छ । कृष्णाप्पा गौथमलाई निरन्तरता दिने देखिन्छ । गौथमले स्पिन बलिङसँगै तल्लोक्रममा राम्रो ब्याटिङ गर्ने गर्दछन् ।

मोहम्मद शामी, शेल्डन कटरेल र क्रिस जोर्डन तीव्र गतिका बलिङ युनिट सम्हाल्ने देखिन्छ । स्पिनरमा रवि विश्रोई रहने छन् । निसमको स्थानमा मुजिब उर रहमानको सम्भावना पनि छ । ओपनर क्रिस गेल आजको खेलमा पनि बेन्चमा रहने देखिन्छ ।

आइपिएलमा यी दुई टोलीबीच २२ खेल भएको छ । जसमा चेन्नई १३ खेलमा विजयी हुँदा ९ खेलमा पराजित भएको छ । गतवर्ष पहिलो खेलमा चेन्नई २२ रनले विजयी हुँदा दोस्रोमा ६ विकेटले पराजित हुन पुगेको थियो ।