एजेन्सी – इन्डियन प्रिमियर लिग (आइपिएल) मा नेपाली लेग स्पिनर सन्दीप लामिछाने दिल्ली क्यापिटल्समा यस सिजन लगातार बेन्चमा रहँदै आएका छन् ।

सन्दीपलाई दिल्लीको टोली सन्तुलन, रणनीति र विदेशी खेलाडीको प्रर्दशनलाई हेर्दा प्लेइङ ११ मा स्थान बनाउन सहज पनि देखिदैन । कुनैपनि खेलाडीको क्षमता भन्दापनि टोलीको आवश्यकता बढी महत्त्वपूर्ण हुन्छ । अर्कोतर्फ चार मात्र विदेशी खेलाडी खेलाउन पाउने हुँदा सन्दीप बेन्चमा बस्नु परेको छ ।

यसपटक आइपिएलमा मध्य सिजन ट्रेडको (खेलाडी साटफेर) चर्चा छ । आइपिएलमा सबै टोलीले ७–७ खेल अर्थात मध्य सिजनपछि मात्र उक्त उक्त नियम लागु हुने छ । जुन मंगलबार देखि लागु भएको छ । एक टोलीलाई कम आवश्यक रहेको खेलाडी अर्कोलाई बढी आवश्यक हुन सक्छ । यसले टोली सन्तुलन बनाउन सहयोग मिल्ने छ ।

सन्दीपले प्लेइङ ११ मा स्थान बनाउन अझै केहि समय पर्खनुपर्ने देखिन्छ । सन्दीप अर्को टोलीबाट आइपिएल खेल्लान् वा दिल्लीमै रहलान् भन्ने नेपाली समर्थक र शुभचिन्तकमा चर्चा चल्न थालेको छ । सबैभन्दा पहिला अन्य टोलीलाई लेग स्पिनरको आवश्यक हुनुपर्छ । लेग स्पिनरको आवश्यक मात्र भएर सन्दीप अर्को टोलीबाट खेल्न सक्दैनन् ।

सन्दीपले अर्को टोलीबाट खेल्न पहिला दिल्ली सहमत हुनुपर्छ । एक सिजनमा एक टोलीले दुई खेलाडी अर्को टोलीलाई बेन्च र किन्न सक्छन् । त्यसको लागि उक्त टोलीमा रहेका खेलाडीले यस सिजनमा दुईभन्दा बढी खेल खेलेको भने हुनु हुँदैन ।

दिल्लीसँग लेग स्पिनरको रुपमा सन्दीप मात्र छन् । अनुभवी लेग स्पिनर अमित मिश्रा औंलामा चोटको कारण आइपिएलबाट बाहिरिसकेका छन् । दिल्लीले दुई अफ स्पिनर अक्षर पटेल र रविचन्द्रन आश्विनलाई नियमित खेलाएको छ । आश्विन किंग्स इलेभेन पन्जाबको खेलको क्रममा घाइते हुँदा बाँकी दुई खेल गुमाउन पुगेका थिए ।

आश्विन घाइते हुँदा मिश्रा दिल्लीको पहिलो रोजाईमा खेलेका थिए । मिश्रा भने पूरा प्रतियोगिताका लागि बाहिरिसकेका छन् । दुर्भाग्यवस आश्विन र पटेल मध्य एक घाइते भएमा त्यसको विकल्प सन्दीप हुन् । सन्दीप र दिल्लीको सम्बन्ध पनि उत्कृष्ट रहँदै आएको छ । जसको कारण पनि सन्दीपले दिल्ली छोड्ने सम्भावना देखिदैन । दिल्ली पनि सन्दीप अर्को टोलीलाई पठाउन चाहदैन ।

अर्कोतर्फ अन्य फ्रेन्चाइज टोलीलाई लेग स्पिनरको आवश्यक त्यति देखिदैन । किंग्स इलेभेन पन्जाबमा रबि बिश्रोईले राम्रो प्रर्दशन गर्दै आएका छन् । चार विदेशी कोटाकै कारण पन्जाबले युवा अफस्पिनर मुजिब उर रहमानलाई सुरुवाती पाँच खेलमा बेन्चमा राखेको थियो । विश्फोटक ब्याट्सम्यान क्रिस गेल बेन्चमा रहँदै आएका छन् ।

राजस्थान रोयल्समा चार विदेशी खेलाडीमा जस बटलर, कप्तान स्टिभ स्मिथ, बेन स्टोक्स र जोफ्रा आर्चर प्रमुख हतियार हुन् । राजस्थानसँग श्रेयस गोपाल लेग स्पिनरको रुपमा छन् । चेन्नई सुपर किंग्समा गत वर्ष आइपिएलका पर्पल क्याप विजेता अनुभवी लेग स्पिनर इमरान ताहिरले हालसम्म मौका पाउन सकेका छैनन् । यता रोयल च्यालेन्जर्स बेंगलोरमा युजभेन्द्र चहलले लगातार उच्च प्रर्दशन गर्दै आएका छन् । एडम जाम्पा विकल्पमा छन् ।

मुम्बई इन्डियन्समा राहुल चहर लेग स्पिनरको रुपमा छन् । उनको प्रर्दशन खराब भएमा वा घाइते भएमा मात्र मुम्बईले अर्को विकल्प खोज्ने देखिन्छ । कोलकातालाई भने लेग स्पिनरको आवश्यक देखिन्छ । क्रिस ग्रिन र कुलदीप यादव स्पिनरको रुपमा छन् । कुलदीप खराब लयको कारण टोली बाहिर छन् । अलराउन्डर सुनिल नारायण पहिलो रोजाईमा खेल्दै आएका छन् ।

चार विदेशी खेलाडीमा कोलकाताले नारायाण, ओईन मोर्गन, आन्द्रे रसेल र प्याट कमिन्सलाई पहिलो रोजाईमा खेलाउँदै आएको छ । जसको कारण कोलकाताले लेग स्पिनर टोलीमा ल्याउने सम्भावना कम देखिन्छ । समग्रमा अन्य टोलीमा पनि सन्दीपले प्लेइङ ११ मा नियमित मौका पाउने सम्भावना देखिदैन ।

सन्दीपको व्यवस्थापन हेर्दै आएका नेपाली क्रिकेट टोलीका टेक्निकल एनालिष्ट रमन शिवाकोटीले पनि सन्दीपले दिल्ली छोड्ने सम्भावना कम रहेको बताउँछन् । ‘हालसम्म अर्को टोलीमा जाने कुनै पनि कुरा चलेको छैन । सबैभन्दा पहिला टिममा निर्भर रहन्छ । सन्दीपले जान्छु भनेर मात्र हुँदैन । अन्य टोली सन्दीपप्रति रुचि देखाउँदा दिल्लीले पनि मान्नुपर्छ’, शिवाकोटीले भने ।

सन्दीप लगातार तेस्रो सिजन दिल्लीमा छन् । सन् २०१८ मा सन्दीपको न्यूनतम मूल्य ३२ लाख रुपैयाँमा अनुबन्ध गरेको थियो । त्यस सिजनमा दिल्ली लिग चरणबाट बाहिरिएपछि मात्र बाँकी तीन खेलमा मौका दिएको थियो । उक्त तीन खेलमा सन्दीपले पाँच विकेट लिएका थिए ।

गत वर्ष दिल्लीले ६ खेलमा मौका दिदा सन्दीपले ८ विकेट लिएका थिए । अन्य विदेशी फ्रेन्चाइज लिगमा सन्दीप पहिलो रोजाईमा खेल्दै राम्रो प्रर्दशन गरेपनि आइपिएलमा भने संघर्ष गर्दै आएका छन् ।