एजेन्सी – ओपनर शिखर धवनको अविजित शतकमा दिल्ली क्यापिटल्सले इन्डियन प्रिमियर लिग (आइपिएल) को ३४ औं खेलमा चेन्नई सुपर किंग्सलाई ५ विकेटले पराजित गरेको छ ।

जितका लागि १ सय ८० रनको विजयी लक्ष्य पछ्याएको दिल्लीले १९.५ ओभरमा ५ विकेटको क्षतिमा लक्ष्य पूरा गर्यो । दिल्लीलाई जितको लागि अन्तिम ओभरमा १७ रन चाहिएको थियो । अक्षर पटेलले रविन्द्र जडेजालाई दोस्रो, तेस्रो र पाँचौ बलमा छक्का प्रहार गर्दै जित पक्का गराए ।

दिल्लीका ओपनर शिखर धवन ५८ बलमा १४ चौका र १ छक्का सहित १ सय १ रनमा अविजित रहे । यो धवनको टि२० क्रिकेटमा पहिलो शतक हो । धवनले ५७ बलमा शतक प्रहार गरेका थिए । धवनलाई सातौं ओभरको तेस्रो बलमा दिपक चहरले व्यक्तिगत २७ रनमा डीप स्क्विायरमा क्याच छोड्दै जीवनदान दिएका थिए । अक्षर पटेल ५ बलमा ३ छक्का सहित २१ रनमा अविजित रहे ।

दिल्लीका ओपनर पृथ्वी शा पहिलो ओभरको दोस्रो बलमै शून्यमा आउट भएका थिए । दिपक चहरले शा लाई क्याच एण्ड बाल्ड आउट गरे । चहरको पाँचौं ओभरको पहिलो बलमा अजिंक्या रहाणे साम करनबाट ८ रनमा आउट भए । १२ औं ओभरको तेस्रो बलमा कप्तान श्रेयस ऐर फाफ डु प्लेसिसबाट २३ रनमा क्याच आउट हुन पुगे ।

शार्दुल ठाकुरले १६ औं ओभरको चौथो बलमा मार्कस स्टोइनिसलाई २४ रनमा अम्बाती रायुडुबाट क्याच आउट गराएपछि खेल रोमान्चक अवस्थामा पुगेको थियो । एलेक्स केरी ४ रनमा आउट भए । दीपक चहरले ४ ओभरमा एक मेडन सहित १८ रन खर्चेर २ विकेट लिए । शार्दुल ठाकुर, साम करन र ड्वेन ब्राभोले एक एक विकेट लिए ।

यसअघि शारजाह क्रिकेट स्टेडियममा टस जितेर ब्याटिङ रोजेको चेन्नईले २० ओभरमा ४ विकेटको क्षतिमा १ सय ७९ रन बनाएको थियो ।अम्बाती रायुडु २५ बलमा १ चौका र ४ छक्का सहित ४५ रनमा अविजित रहे ।

तल्लोक्रममा रविन्द्र जडेजाले उत्कृष्ट ब्याटिङ गर्दै १३ बलमा ४ छक्का सहित ३३ रनमा अविजित रहे । पाँचौ विकेटका लागि रायुडू र जडेजाले २१ बलमा ५० रनको अविजित साझेदारी गर्दै बलियो अवस्थामा पुर्याए । चेन्नईले अन्तिम पाँच ओभरमा एक विकेट गुमाउँदै ६७ रन बनाएको थियो ।

चेन्नईले पहिलो ओभरको तेस्रो बलमै ओपनर साम करनलाई शून्यमा गुमाएको थियो । तुषार देशपान्डेको बलमा करन एनरिच नोर्कियाबाट क्याच आउट हुँदा चेन्नईले खातामा कुनै रन जोडेको थिएन । दोस्रो विकेटका लागि शेन वाटसन र फाफ डु प्लेसिसले ८७ रनको साझेदारी गर्दै चेन्नईको इनिङलाई अघि बढाएका थिए ।

१२ औं ओभरको चौथो बलमा नोर्कियाले वाटसनलाई ३६ रनमा बोल्ड आउट गर्दै दोस्रो सफलता दिलाए । वाटसनले २८ बलमा ६ चौका प्रहार गरे । कागिसो रबाडाको १५ औं ओभरको चौथो बलमा ठूलो सट खेलेका डु प्लेसिस शिखर धवनबाट लङ अनमा ५८ रनमा समातिन पुुगे । डु प्लेसिसले ४७ बलमा ६ चौका र २ छक्का प्रहार गरे ।

नोर्कियाको १७ औं ओभरको तेस्रो बलमा अघि बढेर ठूलो सट खेलेका कप्तान महेन्द्रसिंह एज लाग्दै विकेटकिपर एलेक्स केरीबाट ३ रनमा क्याच आउट हुन पुगे ।

तुषार देशपान्डेले ४ ओभरमा ३९ रन खर्चेर १ विकेट लिए । कागिसो रबाडाले ४ ओभरमा १ मेडन सहित ३३ रन खर्चेर १ विकेट लिए । एनरिच नोर्कियाले ४ ओभरमा ४४ रन खर्चेर २ विकेट हात पारे ।

यो सँगै दिल्ली ९ खेलमा ७ मा जित र २ मा हार सहित १४ अंकका साथ शीर्षस्थानमा उक्लिएको छ । दिल्लीले अब मंगलबार किंग्स इलेभेन पन्जाबसँग खेल्ने छ । चेन्नईले सोमबार राजस्थान रोयल्ससँग प्रतिस्पर्धा गर्ने छ ।

अंक तालिका

यो जितसँगै दिल्ली ९ खेलमा ७ मा जित र २ मा हार सहित १४ अंकका साथ शीर्षस्थानमा उक्लिएको छ । मुम्बई ८ खेलमा ६ मा जित र २ मा हार सहित १२ अंक जोड्दै दोस्रो स्थानमा छ । बेंगलोर ९ खेलमा ६ मा जित र ३ मा हार सहित १२ अंक भएपनि नेट रनरेटको आधारमा तेस्रो स्थानमा छ । कोलकाता ८ खेलमा ४ मा जित र ४ मा हार सहित चौथो स्थानमा छ ।

सनराइजर्स हैदराबाद ८ खेलमा ५ मा हार र ३ मा जित सहित पाँचौ स्थानमा छ । चेन्नई सुपर किंग्स ९ खेलमा ६ मा हार र ३ मा जित सहित छैटौं स्थानमा छ । राजस्थान ९ खेलमा ६ मा हार र ३ मा जित सहित सातौं स्थानमा छ । किंग्स इलेभेन पन्जाब ८ खेलमा ६ मा हार र २ मा जित सहित पुछारमा छ ।

यो पनि : आइपिएलमा रबाडाको कीर्तिमान