काठमाडौं (हाम्रो खेलकुद) – चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगिता चौथो दिन दुबै खेलमा प्रदेशका टोलीबीच प्रतिस्पर्धा हुँदैछ । बिहान ९ बजेबाट सुरु हुने खेलमा टियु मैदानमा सुदूरपश्चिम र बागमती प्रदेश तथा मुलपानीमा गण्डकी र प्रदेश एकबीच प्रतिस्पर्धा हुनेछ ।

ज्ञानेन्द्र मल्लको कप्तानीमा रहेको बागमती लगातार दोस्रो जित निकाल्दै सेमिफाइनल यात्रा सहज बनाउन खोज्ने छ । सुदूरपश्चिम विजयी सुरुवात गर्न खोज्ने छ । बागमतीले पहिलो खेलमा साविक विजेता पुलिसलाई ७ विकेटले हराउँदै उत्कृष्ट सुरुवात गरेको थियो ।

बागमतीमा स्पिनर तिलकराज भण्डारी र तीव्र गतिका बलर नन्दन यादवले ४–४ विकेट लिएका थिए । यी दुवै खेलाडी सुदूरपश्चिमलाई घातक बन्न सक्छन् । ब्याटिङमा पृथु बास्कोटाले ४८ रनको विजयी इनिङ खेलेका थिए । कप्तान ज्ञानेन्द्र मल्ल र पारस खड्का टोलीका प्रमुख ब्याटिङ हतियार हुन् ।

पुलिसविरुद्ध सुरुवाती दुई विकेट लिएका तीव्र गतिका बलर रामनरेश गिरी पनि बागमतीको नायक बन्न सक्छन् । दीपेश श्रेष्ठको स्थानमा बागमतीले युवा तीव्र गतिका बलर गौतम केसीलाई मौका दिन सक्छ । अन्य परिवर्तनको भने सम्भावना कम देखिन्छ ।

यता सुदूरपश्चिम पनि बागमतीलाई हराउँदै विजयी सुरुवात गर्न खोज्ने छ । युवा खेलाडीले भोरिएको सुदूरपश्चिमको कप्तानी सन्तोष भट्टले गर्नेछन् । अरुण ऐरी, खडक बहादुर बोहरा र गजेन्द्र बोहरा शीर्षक्रमका ब्याट्सम्यान हुन् ।

युवा आक्रामक ब्याट्सम्यान किरण ठगुन्ना तल्लोक्रममा बागमतीलाई टाउको दुखाईका ब्याट्सम्यान बन्न सक्छन् । स्पिनर शेर मल्ल टोलीका प्रमुख हतियार हुन् । शेर तल्लोक्रममा राम्रो ब्याटिङको क्षमता पनि राख्ने गर्दछन् । बायाँ हाते स्पिनर विनोद लामा पनि घातक बन्न सक्छन् ।

मुलपानीमा गण्डकी र प्रदेश एक दुबै पहिलो जितको खोजिमा हुने छन् । यी दुई प्रदेशबीच पनि उच्च प्रतिस्पर्धा हुने आशा गरिएको छ । प्रदेश एक एपिएफसँग १ सय ३५ रनले पराजित हुँदा गण्डकी आर्मीसँग ९८ रनले हारेको थियो ।

आर्मीसँग हारेपनि गण्डकीले उत्कृष्ट प्रर्दशन गरेको थियो । गण्डकीका युवा ब्याट्सम्यान अर्जुन कुमाल, समिर कंडेलले आर्मीविरुद्ध उत्कृष्ट ब्याटिङ गरेका थिए । यी दुई ब्याट्सम्यान मुलपानीमा पनि प्रदेश एकलाई टाउको दुखाई बन्न सक्छन् । कप्तान विपिन खत्री तल्लोक्रममा उत्कृष्ट सटको क्षमता राख्ने गर्दछन् । विपिन खत्री र विशाल पौडेल बलिङ हतियार हुन् । सुबास भण्डारी र चन्द्रकान्त पौडेल पनि घातक बन्न सक्छन् ।

एपिएफविरुद्ध २–२ विकेट लिएका दुई युवा स्पिनर हेमन्त राई र दीपेश कंडेल प्रदेश एकका बलिङ हतियार हुन् । यी दुई स्पिनर गण्डकीलाई घातक बन्न सक्छन् । फिर्दोस अन्सारी टोलीका प्रमुख अलराउन्डर हुन् । उनको प्रर्दशन टोलीलाई निकै महत्वपूर्ण हुने छ ।

दीपेश कंडेल पनि तल्लोक्रममा राम्रो ब्याटिङको क्षमता राख्ने गर्दछन् । कप्तान सिद्धान्त लोहनीलाई ब्याटिङमा जिम्मेवारीका साथ ठूलो इनिङ खेल्न आवश्यक देखिन्छ । प्रदेश एकका अन्य खेलाडीलाई ब्याटिङमा जिम्मेवारी इनिङ खेल्न आवश्यक देखिन्छ ।