काठमाडौं (हाम्रो खेलकुद) – सन्दीप रजाली र सौरभ खनालको अर्धशतकको सहयोगमा चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा लुम्बिनीले प्रदेश २ लाई २ सय ५८ रनको चुनौतीपूर्ण लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ रोजेको लुम्बिनीले ५० ओभरमा ९ विकेट गुमाउँदै २ सय ५७ रन बनायो । लुम्बिनीका सन्दीप रजालीले १ सय ७ बलमा ११ चौका सहित सर्वाधिक ८३ रनको योगदान दिए । सौरभ खनालले ६४ बलमा ५ चौका र ३ छक्का सहित ५६ रनमा आउट भए ।

पाँचौं ओभरको दोस्रो बलमा सैफुल्लाह अन्सारी सन्दीप सुनारलाई ११ रनमा एलबिडब्लू आउट गर्दै पहिलो सफलता दिलाएका थिए । सन्दीपले ११ बलमा २ चौका प्रहार गरे । आठौं ओभरको पहिलो बलमा विकेटकिपर सुशान्त सिंह थापालाई दिव्यान्सु मलिकले ६ रनमा एलबिडब्लू आउट गरेका थिए ।

दशौं ओभरको दोस्रो बलमा प्रनित थापा मगर ८ रनमा क्याच आउट भएपछि लुम्बिनी ४२–३ को कमजोर अवस्थामा पुगेको थियो । चौथो विकेटका लागि सन्दीप रजाली र सौरभले ९५ रनको साझेदारी गर्दै इनिङ उकासेका थिए ।

बिक्रम भुषाल ३८ बलमा ३ छक्का सहित ३६ रनमा रन आउट भए । कृष्ण कार्की १०, अनिल खरेल ६ र अमित तामाङले ११ रनको योगदान दिए ।

हरि शंकर शाहले १० ओभरमा ४८ रन खर्चेर ३ विकेट लिए । दिब्यान्सु मलिकले १० ओभरमा १ मेडन सहित ४५ रन खर्चेर २ विकेट लिए । सैफुल्लाह अन्सारी, कुमार थापा र विशाल शुश्लिङले १–१ विकेट लिए ।