काठमाडौं (हाम्रो खेलकुद) – कर्णाली प्रदेशले प्रधानमन्त्री कप राष्ट्रिय एक दिवसिय क्रिकेट प्रतियोगितामा ऐतिहासिक जित निकालेको छ । कर्णालीले मंगलबार गण्डकीलाई ५ विकेटले हराउदै प्रधानमन्त्री कप इतिहासमा पहिलो जित निकालेका हो ।
जितका लागि २ सय ५ रनको विजयी लक्ष्य पछ्याएको कर्णालीले ३६.५ ओभरमा ५ विकेट गुमाउँदै पूरा गर्यो । कर्णालीको जितमा मध्यक्रमका ब्याट्सम्यान हिमान्शु शाही ६० बलमा ७ चौका सहित सर्वाधिक ६८ रनमा अविजित रहे । दिवान पुन ८ रनमा अविजित रहे ।
कर्णालीलाई ओपनर विकेटकिपर विपिन रावलले ४५ बलमा ४ चौका र ३ छक्का सहित ४९ रन जोड्दै राम्रो सुरुवात दिलाएका थिए । १७ औं ओभरको तेस्रो बलमा विपिन खत्रीले बोल्ड आउट गरेपछि अर्धशतक बनाउन एक रनले चुकेका थिए । ओपनर निष्क्षल रावललाई भने पहिलो ओभरको अन्तिम बलमा सुबास भण्डारीले शून्यमा बोल्ड आउट गरेका थिए ।
राज शाह ३० बलमा ५ चौका सहित ३२ रनमा बोल्ड आउट भए । कप्तान रविन्द्रजंग शाही ५ रनमा एलबिडब्लू आउट हुन पुगे । गण्डकीका कप्तान बिपिन खत्रीले १० ओभरमा ५५ रन खर्चेर ४ विकेट लिए । सुबास भण्डारीको नाममा १ विकेट रह्यो ।
त्यसअघि मुलपानी क्रिकेट मैदानमा टस जितेर पहिला ब्याटिङ रोजेको गण्डकी ४२.३ ओभरमा २ सय ४ रनमा अल आउट भएको थियो । गण्डकीका मध्यक्रमका ब्याट्सम्यान राहुल शर्मा उपाध्यायले सर्वाधिक ५३ रनको योगदान दिए । युवा ब्याट्सम्यान अर्जुन कुमालले १ सय ६ बलमा ६ चौका सहित ४६ रनको योगदान दिए ।
गण्डकीले सुरुवात भने कमजोर गरेको थियो । दोस्रो ओभरको चौथो बलमा अनुज चुनाराले दीपेश खत्रीलाई शून्यमा बोल्ड आउट गरेका थिए । दीनेश अधिकारीले समिर कंडेललाई दुई रनमा हेमन्त ओलीबाट क्याच आउट गराए । चुनाराले युवा ब्याट्सम्यान दीपक डुम्रेलाई शून्यमा बोल्ड गर्दा गण्डकी २७–३ को अवस्थामा पुगेको थियो ।
चौथो विकेटका लागि अर्जुन र राहुल शर्मा उपाध्यायले ८९ रनको उत्कृष्ट साझेदारी गर्दै टोलीलाई सम्हालेका थिए । यी दुई गुरु चेलाबीचको साझेदारीले गण्डकीलाई राम्रो योगफलको बाटो तल्लोक्रमका ब्याट्सम्यान चल्न नसस्दा मध्यम योगफलमै समेटिन पुगेको हो ।
२८ औं ओभरको चौथो बलमा दिवान पुनले राहुललाई ५३ रनमा एलबिडब्लू आउट गर्दै साझेदारी तोडेका थिए । राहुलले ६४ बलमा ६ चौका र ३ छक्का प्रहार गरे । चौथो विकेटको साझेदारीपछि भने गण्डकीका ब्याट्सम्यान क्रिजमा धेरै समय टिक्न सकेनन् । अभिषेक थापा ४ रनमै क्याच आउट भए ।
अर्जुन कर्णालीका कप्तान रविन्द्रजंग शाहीको बलमा कटविहाइन्ड हुँदै विकेटकिपर विपिन रावलबाट समातिन पुगेपछि राष्ट्रिय प्रतियोगितामा आफ्नो पहिलो अर्धशतक पूरा गर्न चुकेका थिए । दीनेश बुढामगर १०, सुवास भण्डारी र बिशाल पौडेल १५ रनमा आउट भए । कप्तान विपिन खत्री ३४ बलमा २ चौका र ३ छक्का सहित ३२ रनमा क्याच आउट भए ।
कप्तान रविन्द्रजंग शाहीले १० ओभरमा २ मेडन सहित ३८ रन खर्चेर १ विकेट लिए । दीनेश अधिकारीले ६।३ ओभरमा २५ रन खर्चेर ३ विकेट लिए । अनुज चुनारा ७ ओभरमा १ मेडन सहित २५ रन खर्चेर २ विकेट लिए ।
कर्णाली पहिलो खेलमा आर्मीसँग ८० रनको फराकिलो अन्तरले पराजित भएको थियो । गण्डकी पहिलो खेलमा आर्मीसँग ९८ रनले पराजित भएको थियो । गण्डकीले दोस्रो खेलमा प्रदेश एक लाई २ विकेटले हराएको थियो । गण्डकीले आफ्नो अन्तिम खेल एपिएफसँग माघ ८ मा मुलपानीमा खेल्ने छ । कर्णालीले तेस्रो खेलमा माघ ९ मा टियुमा खेल्ने छ ।
