काठमाडौं (हाम्रो खेलकुद) – चौथो संस्करणको प्रधानमन्त्री कप एकदिवसिय क्रिकेट प्रतियोगिता नेपाल एपिएफ क्लबका तीव्र गतिका बलर कमलसिंह ऐरी सर्वोत्कृष्ट खेलाडी (प्लेयर अफ द टुर्नामेन्ट) चुनिएका छन् ।

राष्ट्रिय टोलीका सदस्य कमलले ६ खेलमा १० विकेट लिए । कोइनमी ३.४१ रहँदा उत्कृष्ट प्रर्दशन ४–११ रह्यो । कमलले गण्डकीसँग ४, आर्मीसँग ३, पुलिससँग २ र आर्मीसँग १ विकेट लिएका थिए ।

त्रिभुवन आर्मी क्लबका स्पिनर साहब आलम प्रतियोगिता उत्कृष्ट बलर चुनिए । साहबले ५ खेलमा ४५.४ ओभरमा ८ मेडन सहित १ सय ५२ रन खर्चेर कुल १२ विकेट लिए । आर्मीलाई उपाधि जिताउन साहबले फाइनलमा एपिएफविरुद्ध उत्कृष्ट प्रर्दशन गर्दै ३ विकेट लिएका थिए । साहबले कर्णालीसँग ३, प्रदेश १ सँग ४, एपिएफसँग २ विकेट लिएका थिए ।

प्रदेश २ का युवा अलराउन्डर विवेक यादव उदीयमान (इमर्जिङ प्लेयर अफ द टुनामेन्ट) खेलाडी घोषित भए । विवेकले ४ खेलमा १ सय ६७ रन बनाएका थिए । उनले लुम्बिनीविरुद्ध ५१ र बागमतीसँग ६६ रन बनाउँदै लगातार अर्धशतक प्रहार गरेका थिए । सुदूरपश्चिमसँग ४१ र पुलिससँग ९ रनमा आउट भएका थिए । साथै विवेक ४ विकेट लिए ।

बागमती प्रदेशका पृथु बास्कोटा प्रतियोगिता उत्कृष्ट ब्याट्सम्यान चुनिए । पृथुले ५ खेलमा २ सय १५ रनमा शीर्ष स्थानमा रहेका थिए । पृथुले प्रतियोगिता अवधीमा २ अर्धशतक, २२ चौका र ७ छक्का प्रहार गरे । पृथु पुलिससँग ४८ रनमा अविजित रहेका थिए । सुदूरपश्चिमसँग ८४ रनमा अविजित रहँदा प्रदेश २ सँग ५३ रनमा अविजित रहेका थिए । लुम्बिनीसँग २९ रन र आर्मीसँग १ रनमा आउट भएका थिए ।

आर्मीले एपिएफलाई ३३ रनले हराउँदै उपाधि जितेको थियो । सेमिफाइनलबाट बाहिरिएका बागमती प्रदेश र नेपाल पुलिस क्लबले ५०–५० हजार रुपैयाँ प्राप्त गरे । प्रतियोगिता सर्वोत्कृष्ट खेलाडीले ५० हजार, उत्कृष्ट ब्याट्सम्यान र बलर२५–२५ हजार तथा उदयमान खेलाडीले १५ हजार रुपैयाँ गरे । विजेता आर्मीले १० लाख र उपविजेताले एपिएफले ५ लाख रुपैयाँ पाउने छन् ।