एजेन्सी – नेपाली राष्ट्रिय क्रिकेट टोलीका अलराउन्डर सोमपाल कामी सम्मिलित मराठा अरेवियन्स टि१० लिगको आफ्नो तेस्रो खेलमा बंगला टाइगर्ससँग ६ विकेटले पराजित भएको छ ।

जितको लागि १ सय ४ रनको विजयी लक्ष्य पछ्याएको बंगलाले ८ ओभरमा ४ विकेट गुमाउँदै पूरा गर्यो । बंगलाका आन्द्रे फ्लेचर ३१, जोहनसन चाल्र्स २३, अफिफ हुसेन २२ र चिराग सुरी १९ रनमा आउट भए । सोमपालले १ ओभरमा १२ रन खर्चेपनि विकेट लिन सकेनन् । यमिन अहमद्जाई, मुक्तर अली र सोहग गाजीले १–१ विकेट लिए ।

त्यसअघि टस हारेर पहिला ब्याटिङ थालेको मराठाले १० ओभरमा कुनै विकेट नगुमाई १ सय ३ रन जोडेको थियो । मराठाका मोहम्मद हफिजले ३० बलमा ७ चौका र ३ छक्का सहित ६१ रनमा अविजित रहे । अब्दुल सकुर ३० बलमा ३ चौका र १ छक्का सहित ३४ रनमा अविजित रहे ।

सोमपालको एक ओभर

सोमपाललाई मराठाले दोस्रो ओभरमा बलिङमा ल्याएको थियो । सोमपाल कामीले वेस्टइन्डिजका आक्रामक ब्याट्सम्यान आन्द्रे फ्लेचरलाई एक रन दिँदै स्पेलको सुरुवात गरे । दोस्रो बलमा वेस्टइन्डिजका जोनसन चार्सले स्लोवर फुलटस बलमा चौका प्रहार गरेका थिए । तेस्रो बलमा डट राखे । चौथो बलमा छक्का प्रहार गरे । पाँचौं र छैटौं बलमा एक एक रन दिए । त्यसपछि भने सोमपालले दोस्रो ओभर पाएनन् ।

सोमपालले दिल्ली बुल्सविरुद्ध एक ओभरमा १७ रन खर्चेका थिए । सोमपालले पहिलो खेलमा नर्थन वारियर्सविरुद्ध २ ओभरमा २८ रन खर्चेका थिए ।