एजेन्सी – युवा अलराउन्डर मेहिदी हसन मिराजको उत्कृष्ट शतकको सहयोगमा बंगलादेशले वेस्टइन्डिजसँगको पहिलो टेष्ट खेलमा विशाल अग्रता लिएको छ ।

दास्रो दिनको समाप्तिमा बंगलादेशले पहिलो इनिङमा ३ सय ५५ रनको अग्रता लिएको छ । टस जितेर पहिला ब्याटिङ थालेको बंगलादेश पहिलो इनिङमा ४ सय ३० रनमा अल आउट भएको थियो । बंगलादेशलाई विशाल योगफलमा पुर्याउन तल्लोक्रमका युवा अलराउन्डर मेहिदी हसन मिराजले १ सय ६८ बलमा १३ चौका सहित १ सय ३ रनको शतकीय इनिङ खेले । आठौं नम्बरमा ब्याटिङ गरेका स्पिन अलराउन्डर मिराजको यो पहिलो अन्तर्राष्ट्रिय शतक हो । सकिब अल हसन १ सय ५० बलमा ५ चौका सहित ६८ रनमा आउट भए ।

विकेटकिपर लिटन दास ६७ बलमा ६ चौका सहित ३८ रनमा बोल्ड आउट भए । ओपनर शादमान इस्लाम १ सय ५४ बलमा ६ चौका सहित ५९ रनमा एलबिडब्लू आउट भए । रन आउट हुनुअघि नज्मुल हसन सान्टोले ५८ बलमा ३ चौका सहित २५ रन जोडे ।

कप्तान मोमिनुल हक ९७ बल खेल्दै २ चौका सहित २६ रनमा क्याच आउट हुन पुगेका थिए । अनुभवी ब्याट्सम्यान मुश्फिकुर रहिमले ६९ बलमा ६ चौका सहित ३८ रन बनाउँदै रेहकम कर्नवालबाट क्याच आउट भएका थिए । ताइजुल इस्लाम १८ र नयिम हसनले २४ रनको योगदान दिए । वेस्टइन्डिजका जोमल वारिकानलेले सर्वाधिक ४ विकेट लिए । रेहकम कर्नवालको नाममा २ विकेट रह्यो ।

दोस्रो दिन पहिलो इनिङ थालेको वेस्टइन्डिजले २९ ओभरमा ७५-२ को अवस्थामा छ । कप्तान क्रेग ब्रेथवेट ८१ बलमा ७ चौका सहित ४९ रनमा अविजित छन् । नक्रुम बोनर १७ रनमा अविजित रहेका छन् । बंगलादेशका मुस्ताफिजुर रहमानले २ विकेट लिए । वेस्टइन्डिजसँगको तीन ओडिआई सिरिज बंगलादेशले क्लिनस्विप गरेको थियो । दुई टेष्ट सिरिजमा घरेलु टोली बंगलादेश त्यस्तै नतिजा निकाल्न खोज्ने छ ।