भुपेन्द्र जिसी, काठमाडौं

नेपाल क्रिकेट संघ (क्यान) ले आइसिसी विश्वकप सुपर लिग-२ अन्तर्गत ओमान भ्रमणको लागि ३२ सदस्य टोलीलाई बन्द प्रशिक्षणमा बोलाएको छ ।

बन्द प्रशिक्षणमा बोलाएका ३२ मध्य २१ जना खेलाडीलाई पहिलो चरणमा प्रशिक्षणमा राखिने छ । पहिलो पटक नेपाली क्रिकेट टोलीको बन्द प्रशिक्षणमा परेका ४ खेलाडी छन् । यी चारै जनाको उमेर १८ वर्षभन्दा कम छ । यसै साता काठमाडौंमा सम्पन्न प्रधानमन्त्री कप एकदिवसिय क्रिकेट प्रतियोगितामा आधार मान्दै खेलाडीलाई बन्द प्रशिक्षणमा बोलाइएको हो ।

नेपाल, ओमान र अमेरिकाबीच चैत ६ देखि १५ सम्म एकदिवसिय त्रिकोणात्मक सिरिज चल्ने छ । पहिलो पटक राष्ट्रिय टोलीको बन्द प्रशिक्षणमा परेका चार खेलाडीको सम्पूर्ण जानकारी यस प्रकार छ ।

१. अर्जुन कुमाल (ब्याट्सम्यान)

१५ वर्षिय युवा ब्याट्सम्यान तथा विकेटकिपर अर्जुन कुमालले पहिलो राष्ट्रिय प्रतियोगिता गण्डकी प्रदेशबाट प्रधानमन्त्रीकप खेल्दै उत्कृष्ट प्रभाव छोडेका थिए । उमेर समूहमा ठूलो आशा देखाएका अर्जुनले राष्ट्रिय प्रतियोगितामा अझ बढी प्रभावित पारे ।

अर्जुनको उमेर कलिलो छ । तर मैदानमा उनले ब्याट चलाउने शैली परिपक्व खेलाडीको भन्दा कम छैन । उत्कृष्ट सट छनोट, धैर्यवान अनि जिम्मेवारी ब्याटिङले सबैलाई प्रभावित पार्दछ । छनोटकर्ता पनि त्यसबाट टाढा रहने कुरा थिएन । अर्जुनले आर्मीविरुद्ध खेल्दै डेब्यू गरेका थिए ।

नेपाली राष्ट्रिय क्रिकेट टोलीका खेलाडीले भरिभराउ आर्मीविरुद्ध ३६ रनको इनिङ खेल्दै यादगार डेब्यू गरेका थिए । त्यसपछि अर्जुनले प्रदेश एक विरुद्ध ३५ र कर्णालीविरुद्ध ४६ रनको इनिङ खेलेका थिए । उनले ओपनिङ गर्दै राम्रो प्रर्दशन गरे ।

पुर्ख्यौली घर गुल्मी भएका अर्जुन भारतमै जन्मेर हुर्केका हुन् । उनी नेपालमा खेल नभएको समयमा भारतमै बस्ने गर्दछन् । बन्द प्रशिक्षणमा परेपछि आमा विष्णु कुमालसँग उनी शुक्रबारनै नेपाल फर्किन लागेका छन् । भारतीय क्रिकेट वातावरणमा हुर्केका उनको खेल्ने शैली अब्बल छ ।

अर्जुन १३ वर्षको उमेरमा नेपाल आएका थिए । पहिलो प्रयासमै उनले सबैलाई प्रभावित पारेर फर्किएका थिए । २०७५ चैतमा यू१६ क्रिकेट लिगमा उत्कृष्ट प्रर्दशन गरेपछि नेपालको यू१६ टोलीमा पर्न सफल भए ।

अर्जुनले सन् २०१९ अप्रिलमा थाईल्यान्डमा भएको एसिसी इस्टर्न रिजन यू१६ प्रतियोगिता खेलेका थिए । उक्त प्रतियोगितामा म्यानमारविरुद्ध १५ बलमा ४ चौका प्रहार सहित २६ रनमा अविजित रहेका थिए । दोस्रो खेलमा मलेसियाविरुद्ध ४७ बलको सामना गरि १ चौका सहित १६ रन जोडे ।

गण्डकी प्रदेश छनोटमा कास्कीबाट खेल्दै अर्जुन सर्वोत्कृष्ट ब्याट्सम्यान चुनिएका थिए । अर्जुन प्रधानमन्त्री कप सकिएपछि दिल्ली पुगेका थिए । तर उता पुगेको केहि दिन नबित्दै उनी खुसीका साथ नेपाल फर्कंदै छन् ।

२.अनुज चुनारा (तीव्र गतिका बलर)

तीव्र गतिका बलर अनुज चुनाराले कर्णाली प्रदेशबाट प्रतिनिधित्व गर्दै उत्कृष्ट प्रर्दशन गरेका थिए । अनुजको घर जाजरकोट हो । कर्णाली प्रदेशबाट चुनाराले डेब्यू प्रधानमन्त्री कपमा ४ खेल खेल्दै ८ विकेट लिए । अनुशासित लाइन एन्ड लेन्थ तथा नियन्त्रित बाउन्सर उनको खुबी हो ।

अनुजले आर्मीविरुद्ध मुलपानीमा डेब्यू गरेका थिए । आर्मीका युवा ब्याट्सम्यान रोहित कुमार पौडेलको विकेट लिँदै प्रतियोगिता सुरुवात गरेका थिए । गण्डकी र प्रदेश एक सँग २–२ विकेट लिए । समूह चरणको अन्तिम खेलमा एपिएफविरुद्ध उत्कृष्ट प्रर्दशन गरेका थिए ।

विभागीय टोली एपिएफलाई कर्णालीले २ सय १८ रनमै अल आउट गरेको थियो जसक्रममा चुनाराले नेपाली क्रिकेट टोलीका अनुभवी ब्याट्सम्यान शरद भेषावकरलाई ८, रित गौतमलाई शून्य र भुवन कार्कीलाई १५ रनमा आउट गरेका थिए ।

अनुजले त्यसअघि गतवर्ष इनरुवामा भएको मनमोहन मेमोरियल क्रिकेट प्रतियोगिता कर्णालीबाट खेलेका थिए । अनुज चितवनमा नेपाली क्रिकेट टोलीका पूर्व कप्तान राजु खड्काको एकेडेमीमा बसेर क्रिकेट सिक्ने गर्दछन् ।

३.विवेक यादव (अलराउन्डर)

१७ वर्षीय अलराउन्डर विवेक यादवले तीव्र गतिमा बलिङ गर्नुको साथै तल्लोक्रममा आक्रामक ब्याटिङ र ठूला सट प्रहार गर्ने गर्दछन् । निडर स्वभावका विवेकले यस सिजनको प्रधानमन्त्री कपका उदीयमान खेलाडी समेत भए ।

विवेकले सातौं राष्ट्रिय प्रतियोगिताबाट नेपाली क्रिकेटमा पाइला टेकेका हुन् । गतपर्ष भारतमा यु१९ टोलीबाट डेब्यू गरेका थिए । राजविराज घर भएका उनी वाईवाई ग्रेट हिमालय क्रिकेट एकेडेमीमा नियमित प्रशिक्षण गर्ने गर्दछन् ।

गतवर्ष प्रधानमन्त्री कप खेलेपनि प्रर्दशन सोचे अनुसार हुन सकेको थिएन । तर यस पटक भने विवेकले उत्कृष्ट प्रर्दशन गरे । विवेकले ४ खेलमा १ सय ६७ रन बनाएका थिए । जसमा ८ चौका र १० छक्का सामेल छ । विवेकले तल्लोक्रममा ब्याटिङ गर्दै लगातार दुई अर्धशतक प्रहार गर्दै धेरैको ध्यान केन्द्रित गरेका थिए ।

लुम्बिनीविरुद्ध आठौं नम्बरमा ब्याटिङ गर्दै ४९ बलमा ३ चौका र ३ छक्का सहित ५१ रन जोडेका थिए । बागमतीविरुद्ध उनले नौं नम्बरमा ब्याटिङ गर्दै ७४ बलमा ३ चौका र ३ छक्का सहित ६६ रनको योगदान दिएका थिए । लगातार दुई अर्धशतक प्रहार गरेका विवेकले सुदूरपश्चिमसँग ४१ रन जोडेपछि नेपाली क्रिकेट टोलीको बन्द प्रशिक्षणको ढोका सहज बनेको थियो ।

पुलिससँग ९ रनमा आउट भएका थिए । तीव्र गतिमा बलिङ गर्ने उनले कुल ४ विकेट लिएका थिए । प्रदेश २ बाट निरन्तर घरेलु क्रिकेट खेल्दै आएका छन् ।

४. खडक बहादुर बोहरा (ब्याट्सम्यान)

सुदूरपश्चिमका १८ वर्षिय खडक बहादुर बोहरा पनि नेपाली क्रिकेटमा ठूलो सम्भावना बोकेका युवा ब्याट्सम्यान हुन् । खडक विकेटकिपर समेत हुन् । उनले उमेर समूह र घरेलु क्रिकेटमा नियमित राम्रो प्रर्दशन गर्दै आएका छन् ।

बैतडीका खडकले गत वर्ष मलेसियामा भएको एसिसी यू१९ रिजनमार्फत नेपाली टोलीमा डेब्यु गरेका थिए । जुन समय खडकले नियमित कप्तान आसिफ शेखको स्थान लिएका थिए । त्यसयता नियमित यु१९ क्रिकेट खेल्दै आएका छन् । आक्रामक र टोलीको आवश्यक दुबै अनुसार ब्याटिङ गर्ने खडक पनि नेपाली क्रिकेटमा ठूलो सम्भावना बोकेका युवा खेलाडी हुन् ।

उनले सिंगापुरविरुद्ध ९० बलमा १२ चौका सहित ९० रनको इनिङ खेलेका थिए । यस सिजनको प्रधानमन्त्री कप क्रिकेटमा सुदूरपश्चिमको प्रर्दशन सम्झन लायक रहेन । तर खडकले भने राम्रो सुरुवात दिलाएका थिए । खडकले नेपाल पुलिस क्लबविरुद्ध ५३ बलमा ८ चौका सहित ४० रन जोड्दै उत्कृष्ट सुरुवात दिलाएका थिए । प्रदेश २ विरुद्ध पनि खडकले राम्रो सुरुवात दिलाउने क्रममा ७३ बलमा ३ चौका सहित ४३ रन जोडेका थिए ।

तेस्रो संस्करणको प्रधानमन्त्री कपमा खडक उदीयमान खेलाडी घोषित भए । उनी हिमालयन क्रिकेट ट्रेनिङ सेन्टरमा प्रशिक्षण लिँदै आएका छन् । यस सिजनमा सुदूरपश्चिमले खडकलाई उप कप्तानको जिम्मेवारी पनि दिएको थियो ।