एजेन्सी – इंग्ल्यान्डका कप्तान जो रुटले भारतसँगको पहिलो टेष्ट खेलको पहिलो इनिङमा कीर्तिमानी शतक प्रहार गरेका छन् ।

चेन्नईमा टस जितेर पहिला ब्याटिङ थालेको इंग्ल्यान्डले पहिलो दिन पहिलो इनिङमा तेस्रो सेसन जारी रहँदा २ विकेट गुमाउँदै २ सय २७ रन बनाएको छ । रुटले १ सय ६४ बलमा १२ चौका सहित आफ्नो टेष्ट करिअरको २० औं शतक प्रहार गरेका हुन् । आफ्नो टेष्ट करिअरको १०० औं टेष्ट खेलि रहेका रुटले आफ्नो उच्च लयलाई निरन्तरता दिएपछि इंग्ल्यान्डले बलियो सुरुवात गरेको छ ।

रुटले यो सँगै नयाँ कीर्तिमान पनि बनाएका छन् । व्यक्तिगत ९८, ९९ र १०० औं टेस्ट खेलमा लगातार शतक बनाउने रुट पहिलो खेलाडी बनेका छन् । यसअघि रुटले जनवरीमा श्रीलंकाविरुद्ध पहिलो टेष्टमा २ सय २८ तथा दोस्रो खेलमा १ सय ८६ रनको इनिङ खेलेका थिए । भारतविरुद्ध शतक बनाउँदै रुटले टेष्ट इतिहासमा नयाँ इतिहास रचेका हुन् ।

इंग्ल्यान्डलाई ओपनर रोरी बर्न्स र डोमिनिक सिब्लेले ६३ रनको साझेदारी गर्दै राम्रो सुरुवात दिलाएका थिए । तर स्पिनर रविचन्द्रन आश्विनले २४ औं ओभरमा रोरीलाई विकेटकिपर ऋभष पन्तबाट ३३ रनमा क्याच गराउँदै साझेदारी तोडेका थिए । रोरीले ६० बलमा २ चौका प्रहार गरे । ड्यान लरेन्सलाई जस्प्रित बुमराहले शून्यमै एलबिडब्लू आउट गरेका थिए ।

तर तेस्रो विकेटका लागि रुट र सिब्लेले उत्कृष्ट साझेदारी गर्दै टोलीलाई बलियो योगफलको बाटो देखाएका छन् । तेस्रो सेसन जारी रहँदा तेस्रो विकेटका लागि रुट र सिब्लेले १ सय ६४ रनको अविजित साझेदारी गरि सकेका छन् । सिब्ले पनि शतकतर्फ अग्रसर छन् । सिब्ले २ सय ५० बलमा १२ चौका सहित ८३ रनमा खेलि रहेका छन् ।