एजेन्सी – कप्तान जो रुटको सानदार कीर्तिमानी शतकसँगै भारतसँगको पहिलो टेष्ट खेलको पहिलो इनिङमा इंग्ल्यान्डले उत्कृष्ट सुरुवात गरेको छ ।

चेन्नईमा टस जितेर पहिला ब्याटिङ थालेको इंग्ल्यान्डले पहिलो दिनको समाप्तिमा ८९.३ ओभरमा ३ विकेट गुमाउँदै २ सय ६३ रन बनाएको छ । कप्तान जो रुट १ सय ९७ बलमा १४ चौका र १ छक्का सहित १ सय २८ रनमा अविजित छन् ।

तेस्रो विकेटका लागि रुट र डोमिनिक सिब्लेले ३ सय ९० बलमा २ सय रनको उत्कृष्ट दोहोरो शतकीय साझेदारी गरेपछि भारत पहिलो दिन घरेलु मैदानमा निरिह बनेको थियो । सिब्ले भने दिनको अन्तिम ओभरमा जस्प्रित बुमराहको बलमा एलबिडब्लू धराप परे । ओपनर सिब्ले २ सय ८६ बलमा १२ चौका सहित ८७ रनमा आउट भए ।

रुटले १ सय ६४ बलमा १२ चौका सहित आफ्नो टेष्ट करिअरको २० औं शतक पूरा गरेका थिए । आफ्नो टेष्ट करिअरको १०० औं टेष्ट खेलि रहेका रुटले आफ्नो उच्च लयलाई निरन्तरता दिएपछि कीर्तिमान बनाउन सफल भएका थिए । व्यक्तिगत ९८, ९९ र १०० औं टेस्ट खेलमा लगातार शतक बनाउने रुट पहिलो खेलाडी बनेका छन् ।

यसअघि रुटले जनवरीमा श्रीलंकाविरुद्ध पहिलो टेष्टमा २ सय २८ तथा दोस्रो खेलमा १ सय ८६ रनको इनिङ खेलेका थिए । इंग्ल्यान्डलाई ओपनर रोरी बर्न्स र डोमिनिक सिब्लेले ६३ रनको साझेदारी गर्दै राम्रो सुरुवात दिलाएका थिए ।

स्पिनर रविचन्द्रन आश्विनले २४ औं ओभरमा रोरीलाई विकेटकिपर ऋभष पन्तबाट ३३ रनमा क्याच गराउँदै साझेदारी तोडेका थिए । रोरीले ६० बलमा २ चौका प्रहार गरे । ड्यान लरेन्सलाई जस्प्रित बुमराहले शून्यमै एलबिडब्लू आउट गरेका थिए । तर त्यसपछि भने रुट र सिब्ले सामु भारतीय बलर निरिह बन्न पुगेका थिए ।