एजेन्सी – इंग्ल्यान्डका कप्तान जो रुटले भारतसँगको पहिलो टेष्ट खेलमा सानदार दोहोरो शतक प्रहार गर्दै टेष्ट क्रिकेट इतिहासमा नयाँ कीर्तिमान राखेका छन् ।

रुटले पहिलो टेष्टको दोस्रो दिन भारतविरुद्ध दोहोरो शतक पूरा गर्दै टोलीलाई विशाल योगफलको बाटो देखाएका छन् । रुटले स्पिनर रविचन्द्रन आश्विनलाई १४२.३ ओभरमा लङअनमा छक्का प्रहार गर्दै करिअरको पाँचौं दोहोरो शतक पूरा गरेका थिए । दोस्रो दिन चिया विश्रामअघि इंग्ल्यान्डले १ सय ४७ ओभरमा ४ विकेट गुमाउँदै ४ सय ५४ रन बनाएको छ ।

कप्तान जो रुट ३ सय ५३ बलमा १९ चौका र २ छक्का सहित २ सय ९ रनमा खेलि रहेका छन् । योसँगै रुट ब्यक्तिगत १ सय खेलमा दोहोरो शतक प्रहार गर्ने टेष्ट क्रिकेट इतिहासकै पहिलो खेलाडी बनेका छन् । रुटले पहिलो दिननै शतक प्रहार गर्दै ९८, ९९ र १०० औं टेष्ट खेलमा लगातार शतक प्रहार गर्ने पहिलो खेलाडी बनेका थिए । रुटलाई युवा ब्याट्सम्यान ओली पोपले २४ रनमा साथ दिएका छन् । पाँचौं विकेटका लागि रुट र पोपबीच ६७ रनको साझेदारी बनि सकेको छ ।

चौथो विकेटका लागि रुटले बेन स्टोक्ससँग १ सय २४ रनको उत्कृष्ट साझेदारी गरेका थिए । स्टोक्स स्पिनर शहबाज नदिमको बलमा चेतेश्वर पुजाराबाट ८२ रनमा क्याच आउट हुन पुगेका थिए । स्टोक्सले १ सय १८ बलमा १० चौका र ३ छक्का प्रहार गरे ।

तेस्रो विकेटका लागि रुट र डोमिनिक सिब्लेले ३ सय ९० बलमा २ सय रनको उत्कृष्ट दोहोरो शतकीय साझेदारी गरेपछि भारत पहिलो दिन घरेलु मैदानमा निरिह बनेको थियो । सिब्ले भने पहिलो दिनको अन्तिम ओभरमा जस्प्रित बुमराहको बलमा एलबिडब्लू धराप परेका थिए । ओपनर सिब्ले २ सय ८६ बलमा १२ चौका सहित ८७ रनमा आउट भए ।

रुटले १ सय ६४ बलमा १२ चौका सहित आफ्नो टेष्ट करिअरको २० औं शतक पूरा गरेका थिए । आफ्नो टेष्ट करिअरको १०० औं टेष्ट खेलि रहेका रुटले आफ्नो उच्च लयलाई निरन्तरता दिएपछि कीर्तिमान बनाउन सफल भएका थिए । व्यक्तिगत ९८, ९९ र १०० औं टेस्ट खेलमा लगातार शतक बनाउने रुट पहिलो खेलाडी बनेका थिए ।

यसअघि रुटले जनवरीमा श्रीलंकाविरुद्ध पहिलो टेष्टमा २ सय २८ तथा दोस्रो खेलमा १ सय ८६ रनको इनिङ खेलेका थिए । इंग्ल्यान्डलाई ओपनर रोरी बर्न्स र डोमिनिक सिब्लेले ६३ रनको साझेदारी गर्दै राम्रो सुरुवात दिलाएका थिए ।

स्पिनर रविचन्द्रन आश्विनले २४ औं ओभरमा रोरीलाई विकेटकिपर ऋभष पन्तबाट ३३ रनमा क्याच गराउँदै साझेदारी तोडेका थिए । रोरीले ६० बलमा २ चौका प्रहार गरे । ड्यान लरेन्सलाई जस्प्रित बुमराहले शून्यमै एलबिडब्लू आउट गरेका थिए । तर त्यसपछि भने रुट र सिब्ले सामु भारतीय बलर निरिह बन्न पुगेका थिए ।

यसअघि रुटका चार दोहोरो शतक

रुटले श्रीलंकाविरुद्ध २०१४ मा घरेलु मैदान लर्ड्समा २ सय रनमा अविजित रहँदै करिअरको पहिलो दोहोरो शतक प्रहार गरेका थिए । पाकिस्तानविरुद्ध २०१६ मा घरेलु मैदान म्यानचेस्टरमा रुटले टेष्ट करिअरकै उत्कृष्ट प्रर्दशन गर्नेक्रममा २ सय ५४ रनको इनिङ खेलेका थिए । गतवर्ष रुटले न्युजिल्यान्डविरुद्ध हामिल्टनमा २ सय २६ रनको उत्कृष्ट दोहोरो शतकीय इनिङ खेलेका थिए । गत जनवरीमा श्रीलंकाविरुद्ध २ सय २८ रनको दोहोरो शतकीय इनिङ खेलेका थिए ।