एजेन्सी – मध्यक्रमका ब्याट्सम्यान काईल मेयर्सले डेब्यू खेलमै कीर्तिमानी अविजित दोहोरो शतकीय इनिङ खेलेपछि वेस्टइन्डिजले पहिलो टेष्ट खेलमा बंगलादेशलाई ३ विकेटले पराजित गर्दै अविश्वसनीय जित निकालेको छ ।

जितको लागि ३ सय ९५ रनको विशाल लक्ष्य पछ्याएको वेस्टइन्डिजले अन्तिम दिन उत्कृष्ट प्रर्दशनका साथ १२७.३ ओभरमा ७ विकेट गुमाउँदै पूरा गर्यो । पहिलो इनिङमा १ सय ७१ रनले पछि परेको वेस्टइन्डिजले सानदार ब्याटिङका साथ पूनरागमन गर्दै सबैलाई आश्चर्य पार्दै जित निकाल्न सफल भयो । जुन एसियामा सर्वाधिक ठूलो लक्ष्य सफलतापूर्व पूरा भएको कीर्तिमान पनि बनेको छ ।

अन्तिम अर्थात पाँचौ दिनको खेल सकिन २.३ ओभर बाँकी रहँदा मेयर्सले अविजित रहँदै वेस्टइन्डिजलाई अविश्वसनिय र अविस्मरणीय जित दिलाएका छन् । वेस्टइन्डिजका नायक मेयर्स ३ सय १० बलमा २० चौका र ७ छक्का सहित २ सय १० रनमा अविजित रहे । डेब्यू खेलको चौथो इनिङमा दोहोरो शतक प्रहार गर्ने उनी विश्वकै पहिलो खेलाडी पनि बनेका छन् । मेयर्सले ३ सय ३ बलमा करिअरको पहिलो खेलमै पहिलो दोहोरो शतक पूरा गरेका थिए ।

मेयर्सले अर्का डेब्यू खेलाडी नक्रुमाह बोनरसँग चौथो विकेटका लागि पाँचौं दिन २ सय १६ रनको उत्कृष्ट दोहोरो शतकीय साझेदारी गरेपछि बंगलादेश घरेलु मैदानमा स्तब्ध बन्नु परेको हो । बोनरले २ सय ४५ बलमा १० चौका र १ छक्का सहित ८६ रनको योगदान दिए । बंगलादेशका मेहिदी हसनले ४ र ताइजुल इस्लामले २ विकेट लिए ।

दोस्रो इनिङमा बंगलादेशले २२३–८ को अवस्थामा इनिङ समाप्तिको घोषणा गरेको थियो । कप्तान मोमिनुल हककले १ सय १५ रनको शतकीय इनिङ खेलेका थिए । लिटन दासले ६९ रनको योगदान दिएका थिए । वेस्टइन्डिजका स्पिनर रेहकम कर्नवाल र जोमल वारिकानलेले ३–३ विकेट लिए ।

त्यसअघि वेस्टइन्डिज पहिलो इनिङमा २ सय ५९ रनमा अल आउट भएको थियो । पहिलो इनिङमा समग्रमा वेस्टइन्डिज १ सय ७१ रनले पछि थियो । ओपनर क्रेग ब्रेथवेटले १ सय ११ बलमा १२ चौका सहित सर्वाधिक ७६ रनको योगदान दिए ।

मध्यक्रमका ब्याट्सम्यान जर्मेन ब्ल्याकवुडले १ सय ४६ बलमा ९ चौका सहित ६८ रनमा क्याच आउट भएका थिए । काइल मेयर्स ४०, जशुवा डी शिल्भा ४२ र नक्रम बोनर १७ रनमा आउट भए । बंगलादेशका स्पिनर मेहिदी हसन मिराजले सर्वाधिक ४ विकेट लिए । मुस्ताफिजुर रहमान, ताइजुल इस्लाम र नइम हसनले २–२ विकेट लिए ।

त्यसअघि टस जितेर पहिला ब्याटिङ थालेको बंगलादेश पहिलो इनिङमा ४ सय ३० रनमा अल आउट भएको थियो । बंगलादेशलाई विशाल योगफलमा पुर्याउन तल्लोक्रमका युवा अलराउन्डर मेहिदी हसन मिराजले १ सय ६८ बलमा १३ चौका सहित १ सय ३ रनको शतकीय इनिङ खेले । आठौं नम्बरमा ब्याटिङ गरेका स्पिन अलराउन्डर मिराजको यो पहिलो अन्तर्राष्ट्रिय शतक हो । सकिब अल हसन १ सय ५० बलमा ५ चौका सहित ६८ रनमा आउट भए ।

विकेटकिपर लिटन दास ६७ बलमा ६ चौका सहित ३८ रनमा बोल्ड आउट भए । ओपनर शादमान इस्लाम १ सय ५४ बलमा ६ चौका सहित ५९ रनमा एलबिडब्लू आउट भए । रन आउट हुनुअघि नज्मुल हसन सान्टोले ५८ बलमा ३ चौका सहित २५ रन जोडे । वेस्टइन्डिजका जोमल वारिकानलेले सर्वाधिक ४ विकेट लिए । रेहकम कर्नवालको नाममा २ विकेट रह्यो । वेस्टइन्डिजसँगको तीन ओडिआई सिरिज बंगलादेशले क्लिनस्विप गरेको थियो । दुई टेष्ट सिरिजको दोस्रो खेल ११ फेब्रुअरी देखि सुरु हुने छ ।