काठमाडौं, (हाम्रो खेलकुद)– एसिया कप क्रिकेट खेल्ने अवसरलाई नेपाली महिला राष्ट्रिय क्रिकेट टोलीकी कप्तान रुविना क्षेत्रिले विश्वकप खेल्नु सरहै हुने बताइकी छिन् । महिला विश्व कपको एसिया छनोटमा उपविजेता बनेको नेपाली टोली मंगलबार स्वदेश आइपुगेपछि रुविनाले यस्तो विचार राखेकी हुन् ।
रुविनाले टोली एसिया कप लागि छनोट हुनु ठूलो उपलब्धी भएको पनि बताइन् । ‘ विश्वकपमा छनोट हुँदा भारत, पाकिस्तान, इङ्ल्यान्ड र अस्ट्रेलियासँग खेल्न पाइन्थ्यो, ’ उनले भनिन्, ‘अब एसिया कपमा भारत, पाकिस्तान, श्रीलंका र बंगलादेशसँग खेल्न अवसर मिल्नेछ । ’ एसिया कप नोभेम्बरमा थाइल्यान्डमा हुनेछ ।
एसिया छनोटमा सहभागि चार मध्ये नेपाल दोस्रो भएको थियो । एसियाबाट थाइल्यान्ड विश्वकप ग्लोबल छनोटमा पुग्न सफल भएको थियो । जसमा आयोजक हङकङ र चीनको पनि सहभागिता थियो । छनोटको उपविजेता हुँदै नेपालले अर्को महिला थाइल्यान्डमा हुने एसिया कपमा स्थान पक्का गरेको हो । छनोटमा नेपालले खेलेका ६ मध्ये ३ खेलमा जित र ३ मा हार बेहोरेको थियो । उनले एसिया कपका लागि तत्काल तयारी सुरु गर्न आवश्यक रहेको बताइन् ।
महिला टोलीका प्रशिक्षक राजु बस्न्यातले एसिया कपमा श्रीलंका, बंगलादेश जस्ता टोलीलाई हराउने लक्ष्यका साथ खेल्नु पर्ने बताएका छन् ।
