काठमाडौं (हाम्रो खेलकुद) – त्रिकोणात्मक टि२० आई सिरिज अन्तर्गत तेस्रो खेलमा नेपालले मलेसियाविरुद्ध पहिला बलिङ गर्ने भएको छ । टियु क्रिकेट मैदानमा नेपालका कप्तान ज्ञानेन्द्र मल्लले टस जितेर पहिला बलिङ निर्णय लिएका छन् ।

नेपालले आज टोलीमा एक परिवर्तन गरेको छ । आरिफ शेखको स्थानमा युवा अलराउन्डर कुशल मल्ललाई मौका दिएको छ । पहिलो खेलमा आरिफले ब्याटिङ गर्ने मौका पाएका थिएनन् । नेदरल्यान्ड्सलाई हराउन डेब्यूद्धय ओपनर कुशल भुर्तेल र आसिफ शेखले विश्व कीर्तिमानी प्रदर्शन गरेका थिए ।

कुशल ६२ रनमा आउट हुँदा आसिफ ५४ रनमा अविजित रहेका थिए । यी दुई ओपनरले पहिलो विकेटका लागि १२.४ ओभरमा १ सय १६ रनको उत्कृष्ट साझेदारी गरेपछि नेपालले १ विकेटको क्षतिमा सहज जित निकालेको थियो । देब्रे हाते अलराउन्डर कुशल मल्ललाई टोलीमा ल्याउँदा तल्लोक्रम ब्याटिङ थप मजबुत हुने छ । कुशल स्पिन पार्टटाइममा राम्रो विकल्प भएका बलर हुन् । पहिलो खेलमा नेपालले नेदरल्यान्ड्सलाई ९ विकेटले पराजित गर्दा दोस्रो खेलमा मलेसिया नेदरल्यान्ड्ससँग १५ रनले पराजित भएको थियो ।

हेड टु हेड :

नेपाल र मलेसियाबीच टि२० आईमा चार खेल भएका छन् । जसमा नेपाल ३ खेलमा विजयी हुँदा एक खेलमा पराजित भएको छ । पछिल्लो पटक नेपाल थाईल्यान्डमा एसिसी इस्टर्न रिजन एसिया छनोटमा पराजित भएको थियो ।

उक्त खेलमा नेपाल २२ रनले पराजित भएको थियो । सन् २०१९ मा नेपालले मलेसियासँग दुई टि२० आई सिरिज ७ विकेट र ६ रनले जितेको थियो । २०१९ मा सिंगापुरमा भएको टि२० विश्वकप एसिया रिजनल छनोटमा ७ विकेटले नेपालले मलेसियालाई पराजित गरेको थियो ।

नेपालको प्लेइङ ११ : ज्ञानेन्द्र मल्ल (कप्तान), दीपेन्द्रसिंह ऐरी, विनोद भण्डारी, सोमपाल कामी, करण केसी, सन्दीप लामिछाने, अभिनाश बोहरा, कुशल मल्ल, आसिफ शेख, कुशल भुर्तेल र साहब आलम ।