काठमाडौं (हाम्रो खेलकुद)– नेपाली राष्ट्रिय क्रिकेट टोलकिा उपकप्तान ज्ञानेन्द्र मल्लसहित तीन खेलाडी अमेरिकाको टेक्ससमा हुने एउटा क्रिकेट प्रतियोगितामा भाग लिन सोमबार त्यसतर्फ उडेका छन् । ज्ञानेन्द्रका साथमा राष्ट्रिय टोलीका शरद भेषावकर र सोमपाली कामी छन् ।
नोभेम्बर ९ देखि १३ गते सम्म आयोजना हुने टु एक्स क्रिकेट प्रतियोगितामा यी तीनसहित ८ खेलाडीले प्रतिस्पर्धा गर्दैछन् । अन्य खेलाडी राष्ट्रिय क्रिकेट टोलीका कप्तान पारस खड्का, बसन्त रेग्मी, सिद्धान्त लोहनी, पृथु बास्कोटा र सुवास खकुरेल छन् । ५ खेलाडी यसअघि नै अमेरिका पुगिसकेका छन् ।
नेपाली खेलाडीले नेपाली राइनोज क्रिकेट क्लबबाट प्रतियोगितामा प्रतिस्पर्धा गर्नेछन् । राइनोजमा नेपालबाट जाने बाहेक टोलीका अन्य खेलाडीमा अमेरिका बस्दै आएका नेपाली रहनेछन् । प्रतियोगितामा ८ टोलीको सहभागिता रहनेछ । सहभागी टोलीलाई दुई समूहमा विभाजन गरिएको छ । राउन्ड रोविन लिगपछि समूहका शीर्ष दुई टोली सेमिफाइनलमा पुग्नेछन् । प्रतियोगितामा १५ खेल हुनेछन् ।
समूह एमा राइनोजसहि एमएसमएम इङ्ल्यान्ड, युएइ फाल्कोन्स र एनजी समरसेट छन् । त्यस्तै पाकिस्तान फस्ट क्रिकेट क्लब, स्मार्ट च्वाइस, अन्डरडग्स र हस्टन स्पार्क समूह बीमा छन् ।
विदेशी भूमिमा कुनै क्लबबाट एकैपटक राष्ट्रिय टोली खेलाडी एकसाथ पहिलो पटक खेल्न लागेको जनाउँदै अमेरिका उड्नुअघि ज्ञानेन्द्रले भने, ‘झन्डै झन्डै राष्ट्रिय टोली भन्दा फरक पर्दैन । हामीले एकै पटक विदेशीभूमिमा क्लबका लागि पहिलो पटक सँगै खेल्न लागेका छौं । यो हाम्रो लागि पनि एक्सपोजर हो । यसले कहि न कहि नेपाली क्रिकेटलाई फाइदा पुग्ने विश्वास लिएका छौं । ’
